დაგროვებითი პენსიის არსი, ისევე როგორც გადასახადების, ის არის, რომ მდიდარი დაეხმაროს ღარიბს და ძლიერი დაეხმაროს სუსტს, – ამის შესახებ შრომის, ჯანმრთელობისა და სოციალური დაცვის მინისტრმა, დავით სერგეენკომ ჟურნალისტებს მთავრობის სხდომის დაწყებამდე განუცხადა.
მისი თქმით, დაგროვებითი პენსია შეეხება საქართველოს ყველა მოქალაქეს. მინისტრის განმარტებით, ამ პროექტის მუშაობა ახლა არ დაწყებულა, არამედ 2012 წლის ბოლოს დაიწყო. მისივე თქმით, პროექტი მსოფლიო ბანკთან თანამშრომლობით ვითარდება. სერგეენკოს განცხადებით, განიხილება ორი ძირითადი ვარიანტი.
“დაგროვებითი პენსიის არსი გამოიხატება იმაში, რომ ნებისმიერი მოქალაქე მუშაობის პერიოდში, როდესაც აქტიურად მუშაობს თავის საშემოსავლოდან ავტორიზებული თანხის რაოდენობას გამოყოფს საპენსიო ფონდისთვის მერე, რომ ჰქონდეს გარანტირებული მაღალი პენსია”, – განაცხადა სერგეენკომ.
ჟურნალისტის კითხვაზე, იმ ფონზე, რომ უმუშევართა რაოდენობა დიდია საქართველოში, როგორი იქნება ამ ადამიანების მიმართ მიდგომა, სერგეენკოს განცხადებით, ანალიზი მიდის იმ რეალური სიტუაციიდან გამომდინარე, რაც დღეს საქართველოშია.
როგორც ცნობილია, მთავრობა დაგროვებითი პენსიის რეფორმის დაწყებას გეგმავს. ამის შესახებ ფინანსთა მინისტრის მოდგილემ, გიორგი თაბუაშვილმა გუშინ, საპარლამენტო უმცირესობასთან შეხვედრაზე, 2014 წლის სახელმწიფო ბიუჯეტის პროექტის განხილვისას ისაუბრა.
18.10.13
