მთავრობის დღევანდელ სხდომაზე სტომატოლოგიური კლინიკების ლიცენზირების საკითხს განიხილავენ. როგორც სხდომის დაწყებამდე ჟურნალისტებთან საუბარში შრომის, ჯანმრთელობისა და სოციალური დაცვის მინისტრმა დავით სერგეენკომ განაცხადა, დღეს არსებული მდგომარეობით, სტომატოლოგიური კაბინეტი არ ექვემდებარება არანაირ ლიცენზირებას, მაგრამ ეს შეიცვლება.
“ნებისმიერს შეეძლო ნებისმიერი აღჭურვითა და ფართით სტომატოლოგიური აქტივობის დაწყება ისე, რომ სამინისტროს საქმის კურსში არ აყენებდა. შესაბამისად, ჩვენ არ გვქონდა არანაირი ბერკეტი, გაგვეკონტროლებინა რა ხდებოდა რეალურად იქ. დღეს მთავრობის სხდომაზე სწორედ ეს საკითხი იქნება ერთ-ერთი განხილვის საგანი”, – განაცხადა სერგეენკომ.
კითხვაზე, ხომ არ გამოიწვევს ეს სტომატოლიგიური მომსახურების ფასების ზრდას, მინისტრის განმარტებით, რისკების გათვლა მოხდა ისე, რომ ამან არ უნდა გააძვიროს მომსახურება.
“თუმცა თუ ყველა რისკს გავთვლით, სასწორის ერთ პინაზე დევს საქართველოს მოქალაქეების ჯანმრთელობა, ძალიან მაღალი რისკი ც ჰეპატიტის და შიდსის, ხოლო მეორე მხარეს სტომატოლიგიური მომსახურების გაძვირება”, – განაცხადა დავით სერგეენკომ.
