კათოლიკოს-პატრიარქის ინიციატივით, საქართველოს გამწვანების ფონდი შეიქმნება, სადაც პირველ შენატანს, შესაწირის სახით, 50 000 დოლარს უწმინდესი შეწირავს , – ამის შესახებ გუშინ, საპატრიარქოში გამართულ შეხვედრაზე ილია მეორემ განაცხადა.
შეხვედრა საქართველოში ეკოლოგიური პრობლემების აღმოფხვრის მიზნით ტყე-პარკების შექმნას, მათ მოვლასა და განვითარების საკითხებს ეხებოდა.
პატრიარქს ამ მიზნით ჯანდაცვის მინისტრი დავით სერგეენკო, გარემოს დაცვის მინისტრი ხათუნა გოგალაძე და განათლების მინისტრი თამარ სანიკიძე სტუმრობდნენ.
შეხვედრაზე ასევე პარლამენტარები, ჯანდაცვისა და განათლების სამინისტროების, თბილისის მერიის, გარემოს დამცველი ორგანიზაციების წარმომადგენლები და ექსპერტები ესწრებოდნენ. შეკრებილებს პატრიარქმა შესთავაზა, მძიმე ეკოლოგიური მდგომარეობის გამო შეიქმნას საქართველოს გამწვანების ფონდი, რომელსაც ეყოლება თავმჯდომარე, მოადგილეები და მდივანი.
პატრიარქმა საზოგადოებას ფონდის თავმჯდომარის კანდიდატურის დასახელება შესთავაზა. საბოლოოდ გადაწყდა, რომ ფონდს ილია მეორე უხელმძღვანელებს. ფონდის თავმჯდომარის მოადგილეობაზე სურვილი შეხვედრაზე მყოფმა მინისტრებმა გამოთქვეს, თუმცა მდივნის კანდიდატურა დღეს ვერ დასახელდა. პატრიარქს შეპირდნენ, რომ მის ვინაობას ერთი კვირის განმავლობაში აცნობებენ.
პატრიარქის განმარტებით, ის ძალიან დაკავებულია და საჭიროა ფონდის მდივანი ისეთი პიროვნება იყოს, რომელიც გამწვანების საკითხებით ადამიანებს დააინტერესებს და აქტიურად იქნება ჩართული ამ პროცესებში. შეხვედრაზე ითქვა, რომ უნდა განისაზღვროს ტერიტორიები, სადაც ხეების დარგვა, მათი წვეთოვანი სისტემით მორწყვა და მეთვალყურეობა მოხდება. ასევე უნდა მოხდეს ამ მიზნით სანერგეებში ნერგების გამოყვანა, დარგვის პროცესში კი მონაწილეობას მიიღებენ მოსწავლეები, რომლებსაც ყოველ გახარებულ ერთ ხეზე 50 თეთრს გადაუხდიან.
პატრიარქის თქმით, ახლახან საპატრიარქოს 50 000 დოლარი შეწირეს და საპატრიარქო მზად არის, ეს თანხა გამწვანების ფონდში პირველი შესაწირის სახით შეიტანოს.
შეხვედრაზე პარლამენტარმა გია გაჩეჩილაძემ აღნიშნა, რომ გლობალურად, საქართველოში არსებულ ტყეების პრობელემას ეს ფონდი ვერ გადაჭრის. მისი თქმით, საჭიროა “ცხელი წერტილების” მოვლითა და გამწვანებით უფრო იყვნენ დაკავებული. გაჩეჩილაძის განცხადებით, წელიწადში საქართველოს 6-8 მილიონი კუბური მეტრი შეშა არ ყოფნის და არის ადგილები, სადაც გარედან ტყეა, შიგნით კი ცარიელი მინდვრები. მანვე გამოთქვა სურვილი პატრიარქის და საპატრიარქოს სახელზე თბილისში გაკეთდეს ისეთივე დიდი საზოგადოებრივი პარკი, როგორიც არის ნიუ-იორკსა და ბერლინში.
ამასთან დაკავშირებით საკუთარი მოსაზრება გამოთქვა ასევე შეხვედრაზე მყოფმა თბილისის მერიის გამწვანების სამსახურის უფროსის მოადგილემ, ვასილ ჩალაძემ. მისი თქმით, თბილისის ზღვაზე 270 ჰექტარზე ჯერ კიდევ არის შენარჩუნებული დენდროპარკი. ასევე იქ არის ტერიტორიები, რომელიც გამწვანებას საჭიროებს და იგი გამოვიდა ინიციატივით, ამ დენდროპარკს მიხედონ. ჩალაძემ აღნიშნა, რომ თბილისში, ქალაქის სხვა ადგილებში გამწვანების დიდი ზონების შექმნა უკვე შეუძლებელია, რადგან უმეტესობა კერძო საკუთრებას წარმოადგენს.
შეხვედრის ბოლოს პატრიარქმა შეკრებილებს მიაწოდა ინფორმაცია, რომ 1-2 ნოემბერს წინანდალში იმართება კონცერტი, რომელიც სწორედ გამწვანების საკითხების პოპულარიზაციას ისახავს მიზნად და პატრიარქმა დღევანდელ შეხვედრაზე მყოფები წინანდალში ამ ღონისძიებაზე მიიწვია.
22.10.13
