დღეს, საქართველოს კულტურისა და ძეგლთა დაცვის მინისტრმა გურამ ოდიშარიამ ლეგენდარული ფრანგი მსახიობი ფანი არდანი მიიღო.
მინისტრთან ერთად შეხვედრას მინისტრის პირველი მოადგილე მარინე მიზანდარი, მინისტრის მოადგილე მანანა ბერიკაშვილი, ეროვნული კინოცენტრის დირექტორი ნანა ჯანელიძე დაესწრნენ.
გურამ ოდიშარიამ მსახიობს ძველი ქართული ორნამენტით შესრულებული მინანქრის სამკაული, სამუზეუმო რეპლიკა და სამინისტროს მხარდაჭერით ფრანგულ ენაზე თარგმნილი ვეფხისტყაოსანი გადასცა. ფანი არდანიმ დიდი ინტერესი გამოხატა გამოცემის მიმართ და მინისტრს დაპირდა, რომ მომდევნო ვიზიტისას მასთან ერთად ვეფხისტყაოსანზე ისაუბრებს. მსახიობი გამოეხმაურა მასპინძლის ინიციტიავას, ქართულ-ფრანგული კოპროდუქციის შექმნის შესახებ და არ დამალა მღელვარება საკუთარი სარეჟისორი ნამუშევრის გამო, რომლის მსოფლიო პრემიერა დღეს, თბილისში, ოთარ იოსელიანისა და თენგიზ აბულაძის ქვეყანაში გაიმართება.
ფილმის “აკვიატებული რითმები” (Obsessive Rhythms) მსოფლიო პრემიერა 24 ოქტომბერს, 20:00 საათზე თბილისში, კინოთეატრ რუსთაველის მეხუთე დარბაზში გაიმართება. ფანი არდანის სარეჟისორო ნამუშევარს პირველად ქართული საზოგადოება შეაფასებს.
ვიზიტის ფარგლებში, დღესვე მარჯანიშვილის თეატრის დიდ სცენაზე ქართველი მსახიობებისათვის ფანი არდანი სამსახიობო ოსტატობაში მასტერკლასს ჩაატარებს.
მსახიობსა და რეჟისორს საქართველოში კინემატოგრაფიის ეროვნული ცენტრი, ფრანგული ინსტიტუტი და საქართველოს კულტურისა და ძეგლთა კულტურის სამინისტრო მასპინძლობს.
ცნობისთვის, ფანი არდანი დაიბადა 1949 წლის 22 მარტს საფრანგეთში, სამხედრო ატაშეს ოჯახში. იზრდებოდა მონაკოში, 17 წლის ასაკში გადავიდა საფრანგეთში და ჩააბარა უნივერსიტეტში პოლიტიკური მეცნიერების მიმართულებით. 20 წლის ასაკში მსახიობობა გადაწყვიტა. მისი სასცენო დებიუტი 1974 წელს შედგა. როგორც მსახიობი ფანი არდანი ცნობილია ფილმებით: “The Woman Next Door”, “Elizabeth”, “Confidentially Yours”, “Ridicule”, “8 Women”, “Callas Forever” და სხვა. ბოლო რამდენიმე წელიაფანი არდანი რეჟისურით დაინტერესდა. 2009 წელს გადაიღო ფილმი „Ashes and Blood“, 2010 წელს მოკლემეტრაჟიანი ფილმი „Chiméres Absentes .
ფანი არდანის ერთ-ერთი პარტნიორი ცნობილი ფრანგი რეჟისორი ფრანსუა ტრუფო იყო, რომლისთვისაც მსახიობი ბოლო მუზად იქცა. სამწლიანი თანაცხოვრების შემდეგ 1984 წელს ტრუფო გარდაიცვალა. მსახიობს ჰყავს 3 ქალიშვილი.
24.10.13
