დამასკოში მომხდარი აფეთქების შემდეგ სირიის დიდი ნაწილი ელექტრო ენერგიის გარეშე დარჩა. გავრცელებული ინფორმაციის თანახმად, აეროპორტის ახლოს მომხდარი აფეთქება სირიელი ოპოზიციონერების მიერ ნასროლმა ჭურვმა გამოიწვია. ჭურვი ენერგო სადგურის გაზსადენ მილს მოხვდა.
სირიის ოფიციალური საინფორმაციო სააგენტო ”სანამ” მილსადენის აფეთქება დაადასტურა და განაცხადა, რომ სარემონტო სამუშაოები გრძელდება.
სააგენტო მთავრობის წარმომადგენელთა მიერ მიწოდებულ ინფორმაციებზე დაყრდნობით აცხადებს, რომ პრობლემა 48 საათში აღმოიფხვრება.
ამავდროულად გავრცელდა ინფორმაცია, რომ დამასკოს დასავლეთით ერთ-ერთ სამხედრო საკონტროლო პუნქტზე აფეთქდა მანქანა, რომელშიაც ბომბი იყო ჩადებული. თვითმხილველთა განცხადებით, აფეთქების შედეგად მრავალი ადამიანი დაიღუპა და დაიჭრა.
ქიმიური იარაღის აკრძალვის ორგანიზაციამ, რომელიც სირიაში მუშაობს, განაცხადა, რომ ასადის ხელისუფლების მიერ ქიმიური იარაღის განადგურებასთან დაკავშირებული პირველი გეგმის ჩაბარებას დღეს ელოდებიან.
25.10.13
