პანდემიის პარალელურად, რუსეთი უკანონო ბორდერიზაციის პროცესს განაგრძობს. ოკუპანტები ზუგდიდი-გალის ადმინისტრაციულ საზღვართან კვირაში რამდენჯერმე მიდიან და სხვადასხვა მოქმედებას ასრულებენ. რას ნიშნავს რუსეთის ასეთი ქმედება კონკრეტულ ვითარებაში? ზემოაღნიშნულის შესახებ “თბილისი თაიმსს” პოლიტოლოგი, მამუკა არეშიძე ესაუბრა.
„ამ შემთხვევაში, პანდემიის ფონი გადამწყვეტი არ არის. ამას ოკუპანტები ყოველთვის აკეთებდნენ. დღეს მთავარი იარაღი, რომელიც რუსეთის ფედერაციას აქვს – გარდა სამხედრო ოპერაციისა – არის ბორდერიზაცია. ბორდერიზაცია არის ბმაში იმ გამოწვევებთან, რომლებიც, რუსეთის აზრით, საქართველოდან მოდის. მთავარი გამოწვევები გახლავთ, მაგალითად, „ღია ცის“ თემა, იგივე – ლუგარის ლაბორატორიის თემა და ზოგიერთი სხვა საკითხი“, – განმარტავს არეშიძე.
პოლიტოლოგის შეფასებით, რუსეთი მიიჩნევს, რომ აშშ-ის ყველაზე ერთგული და სუსტი მოკავშირე საქართველოა.
„შესაძლოა, ეს გამოწვევები მაინცდამაინც საქართველოს არ გულისხმობდეს, მაგრამ მომდინარეობდეს ამერიკის შეერთებული შტატებიდან. შტატების ყველაზე ერთგული და ყველაზე სუსტი მოკავშირე რუსეთისთვის საქართველოა. ამიტომ მიიჩნევს, რომ საქართველოზე შესაძლებელია ექსპერიმენტების ჩატარება – ექსპერიმენტებისა, რომლებიც ნაკლებ დანაკარგს მოიტანს. ამ თვალსაზრისით, საქართველო და უკრაინა რუსეთს ამოჩემებული ჰყავს.
ბორდერიზაციის საკითხი არ არის ის თემა, რომელიც აუცილებლობას წარმოადგენდა, რომ სწორედ ახლა განეხორციელებინა მას. რუსეთში დღეს ძალიან რთული ეკონომიკური და სოციალური ვითარებაა შექმნილი – თუნდაც იმ თვალსაზრისით, რასაც ჰქვია ახლო აღმოსავლეთის პოლიტიკა, სადაც რუსეთს არ გამოსდის ის, რაც უნდა – ლიბია იქნება ეს თუ სირია, მასთან მიმართებით“, – ამბობს პოლიტოლოგი „თბილისი თაიმსთან“ საუბრისას.
როგორც მამუკა არეშიძე აღნიშნავს, რუსეთის ქმედება უკანონო ბორდერიზაციის განახლებასთან დაკავშირებით პასუხია რუსეთის გეოპოლიტიკური ინტერესების შეზღუდვაზე.
„პლუს, „ღია ცის“ თემა რუსეთისთვის არის ძალიან მნიშვნელოვანი. ყველაფერი ეს არის კომპლექსური საკითხი. საბოლოოდ, ჩვენ თვალწინ მიმდინარეობს უკანონო ბორდერიზაციის პროცესი და გვგონია, რომ, მაინცდამაინც, პანდემიის ფონზე წამოიწყეს ეს რუსებმა. სინამდვილეში, ეს არის, გარკვეულწილად, რუსეთის გეოპოლიტიკური ინტერესების შეზღუდვის საპასუხო რეაქცია“, – აღნიშნავს არეშიძე.
ავტორი: მარიამ ტიელიძე
