Covid-19-მა საქართველოში განსაკუთრებული ზარალი ტურიზმს მიაყენა – სექტორს, რომელიც ქვეყნის ეკონომიკის საყრდენია. ზუსტად ამიტომ, მთავრობამ მიზნად დაისახა, უპირველესად სწორედ მისი აღდგენისთვის გადაედგა შესაბამისი ნაბიჯები და ყოფილიყო ქვეყანა, რომელიც პირველი გახსნიდა საზღვრებს ტურისტებისთვის. შესაბამისად, გაიწერა ტურიზმის ამოქმედების ანტიკრიზისული გეგმა, რომელიც ითვალისწინებს, რომ 15 ივნისიდან საქართველო გაიხსნება ადგილობრივი ტურიზმის სერვისების მიწოდებისთვის, პირველი ივლისიდან კი საქართველო მზად იქნება იმისთვის, რომ მიიღოს უცხოელი ტურისტები.
„ამას ჩვენ გავაკეთებთ როგორც სახმელეთო საზღვრებზე უსაფრთხო კორიდორების შექმნით ჩვენს მეზობელ ქვეყნებთან, ასევე, უსაფრთხო კორიდორების შექმნის შესაძლებლობით ორმხრივი მოლაპარაკების თვალსაზრისით ტურისტულად ჩვენთვის საინტერესო ქვეყნებიდან. ეს მოლაპარაკებები უკვე დაწყებულია“, – განაცხადა პრემიერმინისტრმა, გიორგი გახარიამ შესაბამისი გეგმის პრეზენტაციისას.
ტურიზმის ამოქმედების ანტიკრიზისული გეგმის მიხედვით, კორონავირუსამდე ტურიზმი ერთ-ერთი სწრაფად მზარდი ინდუსტრია იყო. გეგმით გათვალისწინებულია, რომ საქართველო უნდა იყოს უსაფრთხო დანიშნულების ადგილი. ამისთვის მას შეძენილი აქვს ახალი კონკურენტული უპირატესობები, ესენია: საქართველო მსოფლიოს არაერთი ქვეყნის მიერ არის აღიარებული, როგორც პანდემიასთან ბრძოლის გამორჩეული მაგალითი.
ტურიზმის ინდუსტრიამ covid-ის პირობებში მიიღო გამოცდილება შემდეგი სახით: 83 სასტუმრო, სატრანსპორტო მომსახურება, 2500-მდე დასაქმებული, 19000 პირი კარანტინში. ინფრასტრუქტურის მზაობა განისაზღვრება შემდეგ მოცემულობებში: აეროპორტი, სასაზღვრე-გამშვები პუნქტები, მუნიციპალური სერვისები – სტანდარტების აღსრულების გამოცდილება ტურისტულად აქტიურ ზონებში.
“ახალი მოთხოვნადი“ ტურისტული პროდუქტების არსებობა და განვითარების შესაძლებლობა – აქ გამოიკვეთა:
• სამკურნალო და გამაჯანსაღებელი ტურიზმი
• სათავგადასავლო ტურიზმი
• ეკო და აგრო ტურიზმი
• ღვინის ტურიზმი
• დაცული ტერიტორიები
• მთის კურორტები.
ტურიზმის ამოქმედების გეგმა სამ ნაწილად გაიყო. პირველი ეტაპი მოსამზადებელ სამუშაოებს ითვალისწინებს. მეორე ეტაპი 15 ივნისით არის დათარიღებული და უსაფრთხო ტურისტული ზონების შექმნასა და შიდა ტურიზმის ამოქმედებას გულისხმობს. ხოლო მესამე ეტაპი არის საერთაშორისო ტურიზმის ამოქმედება და ის 1-ელი ივლისით თარიღდება – ითვალისწინებს ფრენების ეტაპობრივ აღდგენასა და სახმელეთო და საჰაერო საზღვრების გახსნას უსაფრთხო დერეფნების შესაბამისად.
ავტორი: მარიამ ტიელიძე
