პროფესიით ფარმაცევტია, თუმცა, ამ განხრით არასდროს უმუშავია. ბავშვობიდან უყვარს და იზიდავს ხელოვნება. უნდა ითქვას, რომ წარმატებულიც არის ამ მიმართულებით. მას აქვს საკუთარი მეთოდი, როგორ მიანიჭოს ადამიანებს ბედნიერება – ქმნის ნივთებს, რომლებიც კონკრეტული პიროვნებების ანალოგებია. ცხადია, შეუძლებელია, ამან განსაკუთრებული ემოციები არ გამოიწვიოს.
სოფო თავშავაძე საკუთარი საქმიანობისა და დეტალების შესახებ „თბილისი თაიმსს“ თავად ესაუბრება:
როდის და რატომ დაიწყე თიხაზე მუშაობა?
თავდაპირველად თიხაზე მუშაობა (დაახლოებით, 5 წლის წინ) თავისუფალ დროს გართობის მიზნით დავიწყე, რაც ძალიან დიდ სიამოვნებას მანიჭებდა. ამას ახლობლებსა და მეგობრებში დიდი გამოხმაურება, ასევე, დადებითი შეფასებები მოჰყვა, რამაც გადამაწყვეტინა, ჰობი უკვე პროფესიად (მცირე ბიზნესად) მექცია.
კონკრეტულად, რა სახის ნამუშევრებს ქმნი?
ჩემმა ,,ფეისბუქგვერდმა,, დიდი დაინტერესება გამოიწვია ადამიანის მსგავსი ფიგურები შექმნით. ვამზადებ ადამიანის გამოსახულების მსგავს ბრელოკებს, ფოტოს მიხედვით, ასევე, ჭიქებს სხვადასხვა გამოსახულებით, სამკაულებს…
საინტერესოა, რომ ადამიანების მიმსგავსებულ ნივთებს ქმნი – რამდენად რთულია ეს პროცესი, რომ ნამუშევარი მაქსიმალურად ჰგავდეს კონკრეტულ პიროვნებას?
გამოსახულების მსგავსი ფიგურების შექმნა საკმაოდ რთული და, ამავდროულად, საპასუხისმგებლოა. ვცდილობ, მაქსიმალური მსგავსება გამოვიდეს. ძალიან სასიამოვნოა, როდესაც შენი დამზადებული ნივთებით ადამიანებს აოცებ და აბედნიერებ.
ხელოვნების სხვა მიმართულებებით თუ ხარ დაინტერესებული?
მუსიკალური სკოლა მაქვს დამთავრებული. ვუკრავდი ფორტეპიანოსა და ვიოლინოზე, თუმცა, ამ განხრით არ წავსულვარ. ძალიან მიყვარს ხატვა და თავისუფალ დროს ვხატავ.
მასალა მოამზადა : მარიამ ტიელიძემ
