პანდემიის პერიოდში გამოიკვეთა არაერთი საკითხი, რომელიც განსაკუთრებულ ყურადღებასა და სიფრთხილეს მოითხოვს. ტრანსპორტისა და მგზავრობის საკითხი ერთერთი ლიდერი პრობლემაა, რადდან “კოვიდ19”-ით დაინფიცირების საკმაოდ დიდ რისკს შეიცავს.
უფრო კონკრეტულად, რა ხარვეზები იკვეთება და არის თუ არა ქვეყანაში ავტობუსებისა და სამარშუტო ტრანსპორტების რაოდენობა საკმარისი? ამის შესახებ “თბილისი თაიმსი” საავტომობილო ფედერაციის ვიცეპრეზიდენტს, მევლუდ მელაძე-ს დაუკავშირდა.
მელაძის თქმით, დღეს ადამიანებს აქვთ შესაძლებლობა, ისარგებლონ აპლიკაციით, რომლითაც შესაძლებელია სატრანსპორტო გადაადგილების გაზომვა – იმის დადგენა, დაახლოებით, რა დროს არის შესაძლებელი კონკრეტულ ადგილამდე მისვლა, ასევე, რა ტრანსპორტით და რომელ ქუჩაზეა შესაძლებელი გადაადგილება. მისივე შეფასებით, ჩატარებული კვლევის მიხედვით, ამ აპლიკაციას მოსახლეობის ერთი პროცენტიც კი არ იყენებს – უმეტესად, ტურისტები, რომლებიც არსებულ რეალობაში, ფაქტობრივად, აღარც არიან ქვეყანაში.
“ძალიან ხშირია შემთხვევა, როდესაც მგზავრს პირბადე ნიკაპზე აქვს აფარებული. რაც ჩანს, არის ის, რომ ვირუსს სერიოზულად ბევრი არ აღიქვამს. საზოგადოებრივი ტრანსპორტით გადაადგილების დროს უნდა გავუფრთხილდეთ სხვებს და საკუთარ თავს, რადგან დაზღვეული არავინ არის და ამ დროს ვირუსის “გაპარვის” ყველაზე დიდი ალბათობა სწორედ საზოგადოებრივი ტრანსპორტის გადაადგილების დროს არის”, – განაცხადა მევლუდ მელაძემ.
არის თუ არა საქართველოში ავტობუსისა და სამარშუტო ტაქსის საკმარისი რაოდენობა?
ჯერჯერობით, საკმარისი რაოდენობა არ არის. ყველაზე მეტად მაინც უფრო მოქნილი ტრანსპორტის პრობლემა დგას – ახალი ვერსიებისა და ახალი ხაზების, რადგან დიდი ავტობუსები კი არის კარგი და კომფორტული, მაგრამ ყველა უბანში ფიზიკურად ვერ ხერხდება გადაადგილება. მერიისგან არის დაპირება, რომ მოიმატებს ტრანსპორტის რაოდენობა.
სტატია მოამზადა : მარიამ ტიელიძემ
