სკოლების გარკვეულ ნაწილში სასწავლო პროცესი უკვე აღდგა. მოსწავლეებს, ასაკობრივი შეზღუდვის საფუძველზე, აქვთ შესაძლებლობა, რომ გაკვეთილებს უკვე საკლასო ოთახებში დაესწრონ; ცხადია – ჯანდაცვის სისტემის რეკომენდაციებისა და შეზღუდვების საფუძველზე. თუმცა, საბავშვო ბაღები ბავშვებს მხოლოდ 12 ოქტომბრიდან მასპინძლობს. უნდა აღინიშნოს, რომ მშობლების გარკვეულ ნაწილს გადაწყვეტილი აქვს, საკუთარი შვილები არ გაუშვას ბაღში მანამ, სანამ კორონავირუსით გამოწვეული რეალობა უკეთესობისკენ არ შეიცვლება.
“თბილისი თაიმსი” რამდენიმე მშობელს ესაუბრა იმ მიზეზების შესახებ, რის გამოც ისინი თავს იკავებენ, 12 ოქტომბერს გამოცხადდნენ საბავშვო ბაღებში. საერთო სურათი რომ შევაფასოთ, ამის მთავარი მიზეზი შემდეგია – ის სტრესი, რომელიც მოსალოდნელია. რომ გამოწვეული იქნება ბაღებში მიმდინარე პროცესებში იმ პირების ჩართვით, რომლებიც შეამოწმებენ ბავშვებს და გააკონტროლებენ წესრიგსა და რეკომენდაციების დაცვის ხარისხს.
უნდა ითქვას, რომ მთელი რიგი ამის მიზეზებისა ბავშვების მოსალოდნელ, ფსიქოლოგიურ დამოკიდებულებებსა და განწყობებს ეხება. მშობლებს აქვთ შიში, რომ მათ შვილებზე უარყოფითად აისახება, როდესაც მიუთითებენ, რომ არ უნდა ეკონტაქტონ ამხანაგებს, არ შეეხონ ნივთებს და მუდამ აკონტროლონ ჰიგიენა – უფროსებს აქვთ მოლოდინი, რომ ბავშვები შესაძლოა, საკუთარ თავში ჩაიკეტონ და, სამომავლოდ, გაუჭირდეთ მდგომარეობიდან გამოსვლა. ამიტომ, მათ ურჩევნიათ, რომ საერთოდაც არ გაუშვან პატარები საბავშვო ბაღებში.
როგორც ვიცით, არსებული გადაწყვეტილებით, საბავშვო ბაღები 12 ოქტომბრიდან განაახლებენ ბავშვების მიღების პროცესს. ამასთან დაკავშირებით ბაგა-ბაღების მართვის სააგენტოს ხელმძღვანელმა, კახაბერ გვანცელაძემ მონიტორინგი აწარმოა. ახალი რეგულაციის თანახმად, ბავშვები საწოლებში ისე უნდა განთავსდნენ, რომ ვერ ეკონტაქტონ ერთმანეთს ფიზიკურად და, რაც მთავარია, სახით. გარდა ამისა, ბაღების სააგენტომ შეიძინა მეთოდური მასალები, რომლებიც თითოეული ბავშვისთვის განკუთვნილ, ინდივიდურ ჩანთაშია მოთავსებული. ყველა სააღმზრდელო ჯგუფში განისაზღვრა სივრცეები სხვადასხვა აქტივობისთვის, რათა ბავშვთა მცირე ჯგუფების დისტანცირება მოხდეს.
“საკმაოდ მოკლე დროში აღვჭურვეთ და მოვაწყეთ ბაღები დადგენილი რეკომენდაციების შესაბამისად, რის შემდეგაც თითოეული დაწესებულება ჯანდაცვის სამინისტროს შრომითმა ინსპექციამ დეტალურად შეამოწმა. შეიძლება ითქვას, რომ თბილისის საჯარო ბაღები აღსაზრდელების მისაღებად მზადაა“, – განმარტა ბაგა-ბაღების მართვის სააგენტოს ხელმძღვანელმა, კახაბერ გვანცელაძემ.
მასალა მოამზადა : მარიამ ტიელიძემ
