ინფექციური საავადმყოფოს დირექტორის, თენგიზ ცერცვაძის აზრით, კორონავირუსის პანდემიას ახლა უფრო კარგად უმკავლდებიან, ვიდრე დასაწყისში. ამ თემაზე მან სპეციალურ ბრიფინგზე ისაუბრა. მისი თქმით, საქართველოში ამ ეტაპზე 4 300 საწოლია მობილიზებული, რაც დღეს საჭიროზე მეტია.
მისი თქმით, ერთეულ შემთხვევებში, როცა პაციენტის ჰოსპიტალიზებასთან დაკავშირებით პრობლემა იქმნება არ უნდა განზოგადდეს, რადგან ეს გამონაკლისია და საზოგადოებას არ უნდა შეექმნას მცდარი აზრი, რომ ქვეყანა ცუდად უმკლავდება პანდემიას.
“მე პირიქით ვიტყოდი, ახლა უფრო კარგად უმკლავდება, ვიდრე დასაწყისში, რამეთუ მაშინ ადვილი იყო მართვა, როცა ძალიან ცოტა იყო შემთხვევების რაოდენობა და თან მაშინ ქვეყანა წავიდა მკაცრ შეზღუდვებზე, ჩაკეტვებსა და ლოქდაუნზე. და ამან თავისი შედეგი გამოიღო, მაგრამ ახლა ლოქდაუნის გარეშე და ყოველდღე ათასობით ახალი პაციენტის მართვა ისე, რომ მათ სიცოცხლეს საფრთხე არ შეექმნას, ეს არის უმაღლესი პილოტაჟი, ეს არის რთული, გაცილებით რთული, ვიდრე იყო ის, რაც იყო გაზაფხულზე და ახლა ეს ხორციელდება, დამიჯერეთ, დიდი წარმატებით”, – თქვა თენგიზ ცერცვაძემ.
