გაგლო.gaglo – ალბათ, მის შესახებ თანამედროვეობის არაერთმა წარმომადგენელმა კარგად იცის. გიორგი გაგლოშვილი მხატვარი ანიმატორია. რასაც ის აკეთებს, ბევრისთვისაა ძალიან საინტერესო. გიორგი აცოცხლებს ყველასთვის კარგად ცნობილ სახეებს, პერსონაჟებს, გმირებს – შინაარსი მომაჯადოებელია, საყურებლად მაგიურიც კი და, რაც მთავარია, თითოეულ ნამუშევარს აქვს იდეა, საკუთარი სათქმელი და არსი.
უფრო დეტალურად, „თბილისი თაიმსს“ გიორგი გაგლოშვილი თავად ესაუბრა.
უფრო დეტალურად, რას გულისხმობს თქვენი საქმიანობა?
მე ვარ მხატვარ-ანიმატორი. ჩემი საქმიანობა გულისხმობს ანიმაციების შექმნას, პერსონაჟების დახატვასა და მათ გაცოცხლებას.
რა წარმოადგენს თქვენს მიზანს?
მიზანი ძალიან ბევრი მაქვს და ყოველთვის მეცვლება. ამ ეტაპზე ჩემი მიზანია, უფრო მეტი მწერალი და პოეტი გავაცოცხლო ანიმაციაში.
ნამუშევრებს რის მიხედვით ქმნით?
მასალებს იდეები ხატვისა და მუშაობის პროცესში მოდის გზადაგზა. უბრალოდ, ვფიქრობ ამ მიმართულებით, თუ როგორ უფრო კარგი იქნება გაკეთება და, საბოლოოდ, ყალიბდება ის პროდუქტი, რასაც ვდებ.
ბევრია დაინტერესებული თქვენი საქმიანობით?
დიახ, ანიმაციით საკმაოდ ბევრია დაინტერესებული. ძალიან ბევრი მეკითხება, თუ რაში ვაკეთებ ანიმაციებს და დაინტერესება აშკარაა, უბრალოდ, პრობლემა ისაა, რომ საქართველოში არ არსებობს ანიმაციის სკოლა და ყველას ასე თვითნ უწევს ამ საქმის შესწავლა.
უახლოეს მომავალში რა გეგმები გაქვთ, ამ მიმართულებით?
უახლოეს მომავალში ვაპირებ კიდევ რამდენიმე პოეტისა და მწერლის გაცოცხლებას ანიმაციაში და, ზოგადად, პროექტის გაფართოებას.
მასალა მოამზადა : მარიამ ტიელიზემ
