იუდაიზმი იყოფა რამდენიმე მიმდინარეობად, რომელთა შორის ერთ-ერთი ხასიდიზმია. სწორედ ხასიდობის განაყოფია ულტრაორთოდოქსული თემი ნეტურეი კართა, ანუ „ქალაქის მცველნი“. აღნიშნული თემი მიიჩნევა თორის სრულყოფილად მცოდნედ და მისი მცნებების დამცველად.
ნეტურეი კართა, როგორც თემი, არ არის დიდი და მრავალრიცხოვანი, თუმცა ამის მიუხედავად, ისინი გამორჩეულნი არიან იუდაიზმში, როგორც რელიგიური ექსტრემისტები. ძირითადად სახლობენ იერუსალიმსა და ხასიდების მიერ დაარსებულ ქალაქ ბნეიბრაკში.
აღსანიშნავია ის ფაქტი, რომ ნეტურეი კართა სასტიკად ეწინააღმდეგება ისრაელის სახელმწიფოს არსებობას და არ სცნობს მას. მათი აზრით, ამგვარი ქვეყანა აშორებს ხალხს მესიის მოსვლის ჟამისგან.
ბევრი მათგანი უარს ამბობს არა მხოლოდ ისრაელის სახელმწიფოზე, არამედ უზენაესი რაბინატის სასამართლოს იურისდიქციასა და პირადობის დამადასტურებელ მოწმობაზეც.
აღნიშნული თემი თავისი რადიკალიზმით იქამდეც კი მიდის, რომ მხარს უჭერს პალესტინის განმათავისუფლებელ ორგანიზაციას, ხოლო ისრაელის დამოუკიდებლობის დღე (14 მაისი) მათგან გლოვის დღედ არის გამოცხადებული.
ამ დღეს ისინი დემონსტრაციულად წვავენ ისრაელის სახელმწიფოს დროშას და შეურაცხოფენ მის სიმბოლოებს. ყოველგვარი სეკულარიზაციის მოწინააღმდეგენი, ისინი, კერძოდ, პროფანაციად მიიჩნევენ ებრაული ენის გამოყენებას ყოველდღიურ სასაუბრო ენად .
დღეისათვის აშშ-ისა და ევროპის ებრაელთა უმრავლესობა რეფორმირებულ იუდაიზმის მიაკუთვნებს თავს , ხოლო ისრაელში უმრავლესობას ორთოდოქსები წარმოადგენენ.
მასალა მოამზადა: თორნიკე ყრუაშვილმა.
Discussion about this post