ვატიკანის ქალაქ-სახელმწიფოს გოვერნატორატის პრეზიდენტის, კარდინალ ჯუზეპე ბერტელოს განკარგულების თანახმად, წმინდა საყდარში მომუშავე პირი, რომელიც კორონავირუსის საწინააღმდეგო ვაქცინაციაზე უარს იტყვის, სამსახურიდან გათავისუფლდება.
განკარგულებაში ნათქვამია, რომ ვატიკანში დასაქმებულმა პირმა უნდა დაასაბუთოს, რატომ არ გაიკეთა ვაქცინა, წინააღმდეგ შემთხვევაში, მას სხვადასხვა სახის სანქცია დაეკისრება, მათ შორის, სამსახურიდან გათავისუფლება.
განკარგულებაში აღნიშნულია, რომ კორონავირუსის ვაქცინაცია პასუხისმგებელი გადაწყვეტილებაა, რადგან ვაქცინაზე უარის თქმა სხვებს საფრთხეს უქმნის.
ვატიკანმა თანამშრომლებისა და მათი ოჯახის წევრების ვაქცინაცია 13 იანვარს დაიწყო. ამჟამად ვატიკანში ათასამდე ადამიანი ცხოვრობს.