ჯანდაცვის მინისტრი ეკატერინე ტიკარაძე აცხადებს, რომ 13 მარტს შემოსული „ასტრაზენეკას“ ვაქცინით 43 200 მოქალაქე აიცრება, ანუ ზუსტად იმდენი, რამდენი დოზა ვაქცინაც ქვეყანაში შემოვა. ტიკარაძის თქმით, საქართველოს აქვს დასტური, რომ მეორედ ამ პირების ასაცრელად ვაქცინების დამატებითი დოზები 6-12 კვირაში შემოვა.
„მას შემდეგ, რაც ტვირთი იქნება საქართველოს ტერიტორიაზე, რაზეც დამატებით ინფორმაციას მოგაწვდით, მოხდება მისი უსაფრთხო ტრანსპორტირება იმ დაწესებულებებში, სადაც ვაქცინაცია იგეგმება და დავიწყებთ უკვე ვაქცინაციას “ასტრაზენეკათი“. „ფაიზერის” დოზების დალოდება არ მოხდება, რადგან ეს ორი პროცესი ერთმანეთისგან დამოუკიდებლად უნდა წარიმართოს.
„ასტრაზენეკათი“ ავცრით 43 200 ადამიანს და მეორე დოზებით ისინი აიცრებიან მას შემდეგ, რაც მივიღებთ დამატებით „ასტრაზენეკას“ დოზებს. გვაქვს გარანტია, რომ მეორე ვაქცინა გარანტირებულად შემოვა გონივრულ დროში. გვაქვს 6-დან 12 კვირამდე ვადა იმისთვის, რომ „ასტრაზენეკათი“ მეორედ ავცრათ მოქალაქეები. მიღებულია დასტური, რომ მეორე დოზების შემოსვლა მოესწრება“, – განაცხადა ეკატერინე ტიკარაძემ.
