79 მომხრე, 0 წინააღმდეგი – ამ შედეგით დღეს საქართველოს პარლამენტმა კულტურისა და სპორტის სამინისტროს აღდგენის საკანონმდებლო პაკეტს დაუჭირა მხარი. საკანონმდებლო ცვლილებები მთავრობის სტრუქტურის, უფლებამოსილებისა და საქმიანობის წესის შესახებ კანონთან ერთად კიდევ 56 კანონსაც აერთიანებდა, რომლებშიც ახალი სამინისტროს სახელი და უფლებამოვალეობები არის გაწერილი.
აღდგენილი სამინისტროს დაფინანსების შესახებ კანონი ორ ჩანაწერს აკეთებს, კერძოდ, განათლების მეცნიერების, კულტურისა და სპორტის სამინისტროს 2021 წლის 1.8-მილიარდიანი ბიუჯეტი გაიყოფა ორ მიმართულებად.
მიმართულებები და პროგრამები, რომლებიც განათლების სამინისტროდან გადის, ბიუჯეტით განსაზღვრულ დაფინანსებასაც გაიყოლებს. ამ პროგრამების მოცულობა ამჟამად 300.7 მილიონ ლარს აჭარბებს. შესაბამისად, განათლებისა და მეცნიერების სამინისტროს ბიუჯეტი 1.5 მილიარდამდე მცირდება, კულტურისა და სპორტის სამინისტროს დაფინანსება კი 300.7 მილიონ ლარზე მეტი იქნება.
