არცთუ ისე დიდი ხანია, რაც დაარსდა ორგანიზაცია – „სოფლის პატრონი“. ის სოფელ ქორენიშის მოსახლეობამ დააფუძნა. რა მიზნებსა და შედეგებზეა ის ორიენტირებული, რა ეტაპზეა ახლა და რა პასუხისმგებლობებს იღებს საკუთარ თავზე – „თბილისი თაიმსს“ ორგანიზაციის ერთერთი დამფუძნებელი, ლევან ხმელიძე ესაუბრა.
როგორც ის აღნიშნავს, თანასოფლელებმა გადაწყვიტეს, დააეარსებინათ პასუხისმგებლიანი ორგანიზაცია, რომელიც იქნებოდა ორიენტირებული ადგილობრივების საჭიროებებსა და ხარისხიან მომსახურებაზე – ეს იქნებოდა იურიდიული ორგანო, რომელიც წარმოადგენდა სოფელს და, ამასთან, გაკონტროლდებოდა მისი კეთილსინდისიერება.
ლევანის განმარტებით, ბოლო 2-3 წელია, ქორენიშში ახალგაზრდა თაობა ბრუნდება – საკუთარ კერასა და მამულს უბრუნდებიან. ყველა ერთად კი აწყდება პრობლემებს, რომ ყველაფერი გასაკეთებელია ნულიდან – ბევრი ხარვეზია, რომელთა მოგვარებაც აუცილებელია სოციალიზაციისთვის – „გადავწყვიტეთ, არავის ველოდოთ, ვინ რას გააკეთებს. საქმეს ჩვენ თვითონვე მოვკიდეთ ხელი, ჩვენ ვართ საკუთარი სოფლის პატრონები“.
ორგანიზაციის დაარსების მიზანზე საუბრისას ლევანი აღნიშნავს, რომ ეს, უპირველესად, მაღალმთიანი რეგიონების სოფლებში სოციალური, ეკონომიკური და ინფრასტრუქტურული პირობების გაუმჯობესება გახლდათ ადგილობრივი მოსახლეობისთვის.
„ვინაიდან დამფუძნებლები ვართ სოფელ ქორენიშიდან, პირველი წელი სწორედ ის იქნება სამუშაო არეალი. იგეგმება სასმელი წყლის მოწესრიგება, გზის რეალიბიტაცია, ნაგავსაყრელის მოწესრიგება. მაღალმთიან სოფლებში ნაგავსაყრელების უდიდესი პრობლემაა. შედეგად, ბინძურდება ბუნება. ჩვემ ვიღებთ ამ სოციალურ პასუხისმგებლობას“.
რესპონდენტი ორგანიზაციის მიზნებში მუნიციპალურ დონეზე ჩართულობასაც აღნიშნავს. როგორც ის განმარტავს, ადგილობრივ მერიაშიც გააცნეს ორგანიზაციის ხედვები, გეგმები და გამოთქვეს მზაობა, რომ თვითმმართველობა და ადგილობრივი მოსახლეობა ერთად ჩაერთვებიან პროცესებში, გადადგამენ ნაბიჯებს შედეგებისთვის, განვითარებისა და წინსვლისთვის.
„შევხვდით მერის მოადგილეს. კმაყოფილები ვართ ამ შეხვედრით. დეტალურად გავიარეთ პროცესები და დავისახეთ მიზნები. იგეგმება მათი ადგილზე მოსვლა“.
ხმელიძის განმარტებით, ორგანიზაციას აქვს საკუთარი ,,ფეისბუქგვერდი“ და მისი ყველა ნაბიჯი იქნება საჯარო. ამასთან, „სოფლის პატრონს“ არ ჰყავს დამფინანსებელი.
,,ხაზგასმით აღვნიშნავთ, რომ ორგანიზაცია იმუშავებს ქორენიშის მოსახლეობის პირადი სახსრებით, რაც იმას ნიშნავს, რომ მათი ყოველთვიური შენატანით შეიქმნება ბიუჯეტი. „სოფლის პატრონს,, აქვს შემდეგი მნიშვნელობა – ის იღება პასუხისმგებლობას, ოჯახებმა გააცნობიერონ, რომ სოფელი მხოლოდ საკუთარ კარ-მიდამოს არ ნიშნავს, არამედ – ერთმანეთის გვერდში დგომას, რაც მეტ შედეგს განაპირობებს. ეს იქნება ბევრისთვის მაგალითი. ჩვენ, ადგილობრივებს ერთად მუშაობის გამოცდილება გვაქვს. ორგანიზაციის მმართველი გუნდი იღებს ვალდებულებას ყოველი ნაბიჯის გამჭვირვალობაზე“, – განმარტავს ლევან ხმელიძე „თბილისი თაიმსთან“ საუბრისას.
მასალა მოამზადა : მარიამ ტიელიძემ
Discussion about this post