ჩვენს თანამედროვეობაში საზოგადოებაში აზრი, იმის შესახებ, უნდა ისწავლებოდეს თუ არა სკოლებში რელიგიის ისტორია, როგორც საგანი, ორად იყოფა. საზოგადოების ნაწილი თანხმდება იმის გარშემო, რომ რელიგიის ისტორიის შესწავლა სკოლებში სავალდებულო და აუცილებელი უნდა იყოს. მეორე მხრივ კი, მოქალაქეთა ნაწილს მიაჩნია, რომ აღნიშნული საგანი სკოლებში სულაც არ უნდა ისწავლებოდეს.
როგორია დღევანდელი მდგომარეობა ამ მხრივ საქართველოში?
დღესდღეობით საჯარო სკოლებში რელიგიის ისტორია, როგორც საგანი, უკვე წლებია აღარ ისწავლება. თუმცა აღსანიშნავია ის ფაქტი, რომ არსებობს კერძო სკოლათა მთელი რიგი, სადაც რელიგიათა ისტორია ჩვეულებრივ ისწავლება და იგი სავალდებულო საგანთა სიას მიეკუთვნება.
აღნიშნული თემის გარშემო სასაუბროდ, სოლოლაკის მაცხოვრის შობის ტაძრის მღველმსახურს, მამა გურამ ჭარელაშვილს დავუკავშირდით:
მამა გურამ, პირველ რიგში, მინდა გკითხოთ, რამდენად მნიშვნელოვანია საზოგადოებისთვის რელიგიების ისტორიის ცოდნა?
რელიგიას თუ განვიხილავთ, როგორც ადამიანის ღმერთთან დაკარგული კავშირის აღდგენის საშუალებას (ან მცდელობებს), რელიგიის ისტორია წარმოგვიდგება, როგორც სხვადასხვა საუკუნეში, თუ სხვადასხვა ადამიანების მიერ, ამ დაკარგული ურთიერთობების აღდგენის „მცდელობები“, რომლებმაც განვლილი დროის განმავლობაში ძალიან საინტერესო და მნიშვნელოვანი ცოდნა შემოგვინახა, როგორც საკვლევი მასალის, ისე, ადამიანისათვის უდიდესი, სასარგებლო გამოცდილების კუთხით.
როგორ ფიქრობთ, უნდა ისწავლებოდეს თუ არა სკოლებში რელიგიის ისტორია?
თუ თანამედროვე განათლების სისტემის ამოცანაა მოსწავლე მოამზადოს საზოგადოებაში ბუნებრივი ადაპტაციისთვის, პასუხმსგებლიანი მოქალაქის ჩამოყალიბებისა , საკუთარი თავის განვითარებისა და ოჯახის, ქვეყნის სასარგებლოდ რეალიზაციისთვის, რელიგიის ისტორიის სწორად, დროულად და ზომიერად მიწოდება, ვფიქრობ, მასზე ძალიან მნიშვნელოვან დადებით გავლენას მოახდენს.
დაახლოებით რომელი საფეხურიდან (კლასიდან) უნდა დაინერგოს იგი სკოლებში?
ალბათ ზომიერად, მცირე „დოზით“. შესაძლებელია ნელ-ნელა, მეოთხე-მეხუთე კლასიდან, თუმცა დიდი სიფრთხილითა და კარგად დამუშავებული ფორმით.
როგორ მიგაჩნიათ სწორად, სკოლებში საგნის- რელიგიის ისტორიის დამატების შემთხვევაში, მოსწავლეთათვის იგი უნდა იყოს სავალდებულო თუ ნებაყოფლობითი?
ვფიქრობ, რომ სავალდებულო არ უნდა იყოს.
თქვენი აზრით, კონკრეტულ საგანში თანაბარი დრო და მასალა უნდა ჰქონდეს თუ არა დათმობილი სხვადასხვა რელიგიებს, თუ მართლმადიდებლობა უნდა იყოს ცალკე გამოკვეთილი, როგორც საქართველოში უმრავლესობის კონფესია?
ვფიქრობ, კარგად უნდა წარმოჩინდეთ, თუ საუკუნეების მანძილზე რა სარგებელი და სიკეთე მოუტანა სამყაროს სხვადასხვა რელიგიამ თავისი აზროვნებითა და ფასეულობათა სისტემით და ამის მერე მოზარდს გარკვეული დრო უნდა მიეცეს, თვითონ აირჩიოს რომელი რელიგიის შესწავლას ანიჭებს უპირატესობას. ზოგადად, დარწმუნებული ვარ, თუ პედაგოგი სწორად და ხარისხიანად წარმოაჩენს ქრისტიანობის როლს მსოფლიო ცივილიზაციის, შემწყნარებლობის, თავისუფლების, თანაბარი უფლებების, ტოლერანტობისა და სხვა უამრავი ფასეულობის ჩამოყალიბებაში, ეს საგანი უკლებლივ ყველა მოსწავლისთვის იქნება საინტერესო და ძალიან სასარგებლო. ანუ, თუ ქრისტიანობას სწორად წარმოვაჩენთ, ის თვითონ მოიპოვებს უპირატესობას.
მასალა მოამზადა: თორნიკე ყრუაშვილმა.
