საკმაოდ ბევრმა იცის, რომ ჩვენს ქვეყანაში არსებობს „მანდილი“, რომელიც აწარმოებს ქართულ თემატიკაზე შექმნილ პროდუქციას. დაწყებული ქართული ანბანით და დამთავრებული ჩვენი ქვეყნის უძველესი ორნამენტებით – ეს არის ის ძირითადი ხაზი, რომელსაც „მანდილი“ მიჰყვება.
დღესდღეობით მათი წარმოება განსაკუთრებით საინტერესო და მოთხოვნადია არამხოლოდ ქართველებისთვის. დეტალებზე „თბილისი თაიმსს“ კომპანიის დამფუძნებელი, გიორგი ჭიკაძე ესაუბრა.
რამდენი ხანია, რაც არსებობს „მანდილი“?
კომპანია ახალი შექმნილია. ჩვენი პროდუქტის რეალიზება პირველად 2019 წლის 8 ოქტომბერს, თბილისობის ფარგლებში გამართულ ღონისძიებაზე განხორციელდა. პირველივე დღეებიდან დიდი ინტერესი გამოხატა საზოგადოებამ და ჩვენთვის ძალიან სასიხარულო და საამაყოა თითოეული მომხმარებლის გამოხმაურება.
დიზაინს რის მიხედვით ქმნით?
ჩვენი ნამუშევრები ქართულ ეროვნულ თემატიკაზეა შექმნილი. ისტორიულ წყაროებში დაცული ეროვნული ორნამენტების შესახებ მოძიებული ნიმუშების აღდგენისა და მისი თანამედროვე სტილში გარდაქმნით მზადდება თითოეული პროდუქტი (აქსესუარი და ა.შ) და სწორედ ეს ანიჭებს მათ გამორჩეულ ნიშას. ასევე, გვაქვს ჩვენივე შემუშავებული დიზაინი, რომელიც ასახავს თანამედროვე თემატიკას.
ამ ეტაპზე კომპანიის ძირითადი პროდუქტია ქართულ თემატიკაზე შექმნილი ყელსახვევები, ქალის თავსაბურავი (მანდილი), ზურგჩანთები და სუფრა. ჩვენ მიერ შექმნილ ნამუშევარს თან ახლავს მოკლე ინფორმაცია გამოყენებული ორნამენტის/ფოტო მასალის შესახებ და ბრენდირებული შეფუთვა.
თქვენს პროდუქციას უცხოელი მომხმარებლებიც ჰყავს?
ამ ეტაპზე, ჩვენი პროდუქცია საქართველოს მასშტაბით იყიდება, გვაქვს შეკვეთები სხვადასხვა რეგიონიდან. თუმცა, ადგილობრივი მოსახლეობის გარდა, ინტერესს უცხო ქვეყნის მოქალაქეებიც გამოხატავენ და, ასევე, ხშირია შემთხვევა, როდესაც ჩვენი მანდილი საზღვარგარეთ საჩუქრად მიაქვთ. ჩვენ ასევე ვთანამშრომლობთ ქართულ-გერმანულ კომპანიასთან და ჩვენი პროდუქცია აქტიურად იყიდება გერმანულ ბაზარზე.
მასალა მოამზადა : მარიამ ტიელიძემ
