პირველ ქართულ სპორტულ კომიქსს საკუთარი ისტორია აქვს. ამ ისტორიის გარდამტეხი ეტაპი 2019 წელთან არის დაკავშირებული, როცა იდეის რეალობად ქცევის შესაძლებლობა გაჩნდა. ხსენებული კომიქსის ავტორი გახლავთ გუნდი, რომელიც ბავშვებისა და ახალგაზრდების ყოველდღიურობის გაჯანსაღებისკენ არის მიმართული.
უფრო დეტალურად, რა მიზანზეა კომიქსი ორიენტირებული – „თბილისი თაიმსს“ ორგანიზაცია „ახალი საზოგადოების“ ხელმძღვანელი, ლუკა ქამუშაძე ესაუბრა.
პირველი ქართული სპორტული კომიქსის ავტორი ხართ – როდის დაწყეთ მასზე მუშაობა?
კომიქსის ავტორი ორგანიზაცია „ახალი საზოგადოების“ გუნდია.
იდეა რამდენიმე წელია, გვაქვს, მაგრამ მის განსახორციელებლად, გარდა ფინანსებისა, საჭირო იყო შესაბამისი გუნდის მოძიება, რომელსაც შეეძლო ხარისხიანი პროდუქტის შექმნა.
2019 წელს ორგანიზაცია „დავითიანმა“ გამოაცხადა მცირე საგრანტო კონკურსი, სადაც პირველი ქართული სპორტული კომიქსის იდეა წარვადგინეთ.
ამ მცირე გრანტმა მოგვცა ბიძგი და რწმენა, რომ ღირდა ამ პროექტის წარმოება და დიდ გეგმებზე ფიქრი.
ხანგრძლივი პროცესი იყო შესაბამისი კადრების მოძიება, ამ ეტაპისთვის, პროექტს განვითარებში ეხმარება “ხანძთელის ფონდი”, გვყავს სწორედ ის შემოქმედებითი გუნდი, რომელსაც შეუძლია ღირებული პროდუქტის შექმნა.
რა წარმოადგენდა თქვენს მიზანს ამ პროცესში?
კომიქსის მიზანია ბავშვებში დადებითი თვისებების გამოღვიძება, რაც დაეხმარება მათ სწორი და ჯანსაღი შეხედულებების ფორმირებაში.
ჩვენი ორგანიზაცია ბავშვებისა და ახლგაზრდების მიმართულებით მუშაობს, აქტიურად ვეცნობით ამ მიმართულებით არსებულ გამოწვევებს. ერთ-ერთი საგულისხმო საკითხია ბავშვებსა და ახალგაზრდებში პრობლემური ქცევა და ჯანსაღი ცხოვრების მიმართ დაბალი დაინტერესება.
კომიქსში დიდი ადგილი უკავია სპორტს და, კონკრეტულად, რაგბის. ჩვენ ვფიქრობთ,
რაგბი და, ზოგადად, სპორტი არის საუკეთესო გზა იმისათვის, რომ მოზარდებში შევამციროთ პრობლემური ქცევა და დავანახოთ ისეთი ფასეულობები, როგორიცაა პატივისცემა, მეგობრობა, ურთიერთდახმარება და წაგების ღირსეულად მიღება.
ქართველ ახალგაზრდებსა და ქართულ რეალობაზე რამდენად არის ის მორგებული?
ჩვენ ვცდილობთ, რომ კომიქსის პერსონაჟებთან მაქსიმალურად გააიგივონ თავი საკუთარმა მკითხველებმა, ჩვენს გმირებთან ერთად ვეძებოთ უკეთესი გამოსავალი რთულ სიტუაციაში და ვისწავლოთ რაგბი. კომიქსში მოვლენები ვითარდება რეალურ დროსა და გარემოში.
მის მიმართ დიდია ინტერესი?
თუ გავითვალისწინებთ იმას, რომ ჯერ პროექტის პრეზენტაციაც არ გვქონია, ვფიქრობ, საკმაოდ დიდია დაინტერესება. გვაქვს მოლაპარაკებები სხვადასხვა პარტნიორთან.
მასალა მოამზადა : მარიამ ტიელიძემ
