როგორი მდგომარეობაა დღეს ჩვენს ქვეყანაში ეკონომიკური თვალსაზრისით და რა მოხდება მაშინ, თუ, კოვიდპანდემიიდან გამომდინარე, საქართველოში მესამე „ლოქდაუნი“ გამოცხადდება. აღნიშნულ საკითხს „თბილისი თამსთან“ საუბრისას ექსპერტი, დავით კიკვიძე აფასებს.
როგორც ის აღნიშნავს, დღეს საქართველოში ეკონომიკა ძალიან მძიმე მდგომარეობაშია.
„რეალურად, ეკონომიკა ძალიან მძიმე მდგომარეობაშია. თან, თუ გავითვალისწინებთ იმას, რომ ახლახან ეროვნულმა ბანკმა გაზარდა რეფინანსირების განაკვეთი და თან მთელი 1 პროცენტით – არა ნახევარით, როგორც ის ამას აქამდე აკეთებდა. ეს პირდაპირ მიანიშნებს იმაზე, რომ ეკონომიკა საკმაოდ სერიოზულად მძიმე მდგომარეობაშია. ინფლაცია, ფაქტობრივად, თითქმის ორჯერ მეტია, ვიდრე დაანონსებული იყო. ამის გამომწვევი ფაქტორია ლარის კურსი და სხვა თანმდევი ფაქტორები – პანდემია და ა.შ“, – ამბობს კიკვიძე.
ის იმ მოცემულობაზეც საუბრობს, რომელიც ჩვენს ქვეყანაში, ეკონომიკური თვალსაზრისით, მესამე „ლოქდაუნის“ შემთხვევაში იქნება.
„რაც შეეხება შემდეგ ,,ლოქდაუნს“ – რა თქმა უნდა, ეს დამატებითი წნეხი იქნება ეკონომიკისთვის. რეფინანსირების გაზრდილი განაკვეთის ფონზე, იზრდება ლარის რესურსი – ძვირდება ფული. ამ გაძვირებასთან ერთად, მცირდება ფულთან ხელმისაწვდომობა იმიტომ, რომ კომერციულ ბანკებსა და ფინანსურ ინსტიტუტებს მოუწევთ გარკვეული რისკების მინიმიზაციის კუთხით საკრედიტო პოლიტიკის გამკაცრება. ეს დამატებითი წნეხი იქნება ეკონომიკური სუბიექტებისთვის.
ამ პირობებში, „ლოქდაუნი“ იქნება ცეცხლზე ნავთის დასხმა“, – განმარტავს დავით კიკვიძე „თბილისი თაიმსთან“ საუბრისას.
მასალა მოამზადა : მარიამ ტიელიძემ
