ქართველი მაყურებელი უკვე ძალიან დიდი ინტერესით ელოდება პროექტ „მასტერშეფის“ ყოველ მომდევნო სეზონს. კულინარიული ექსპერიმენტები მათთვის გამორჩეულად საინტერესო სანახავი აღმოჩნდა. ამ მაღალრეიტინგული გადაცემის მეოთხე სეზონის გამარჯვებული მირიან სულაკაურია.
მირიანმა საზოგადოებას თავი საკუთარი კრეატიულობითა და საინტერესო იდეებით დაამახსოვრა. სანამ პროექტში მიიღებდა მონაწილეობას, უკვე ჰქონდა მზარეულობის რვაწლიანი გამოცდილება. გადაწყვეტილება, რომ ეს მიმართულება აერჩია, ჯერ კიდევ სკოლის პერიოდში მიიღო – როდესაც სწავლას თავი დაანება და კულინარიის შესწავლას შეუდგა – „ეს იყო ის, რასაც მინდოდა, რომ გავყოლოდი“.
როგორც მირიანი აღნიშნავს, „მასტერშეფში“ გამარჯვებამ მის ცხოვრებაში გარკვეული ცვლილებები შეიტანა. გაიზარდა მის მიმართ ცნობადობა, რაც დაეხმარა იმაში, რომ ახალ და საინტერესო პროექტებზე ემუშავა – როცა სურვილი უჩნდებათ, გახსნან კაფე ან რესტორანი, უკავშირდებიან, რადგან მისი ხედვა მათთვის საინტერესოა.
მირიანი იმ ინტერესებზეც საუბრობს, რაც კულინარიასთან ერთად აქვს.
„ყველაფერი მიყვარს და მიზიდავს, რაც ხელოვნებასთან არის დაკავშირებული. ყველანაირი ხელსაქმე – ქარგვა, ქსოვა, კერვა, ხატვა… ერთადერთი, რაც არ გამომდის, არის სიმღერა, არ მაქვს ამის ნიჭი“, – ამბობს მირიან სულაკაური „თბილისი თაიმსთან“ საუბრისას.
მასალა მოამზადა : მარიამ ტიელიძემ
