ისრაელ-პალესტინის კონფლიქტი კვლავ აქტუალურია. სარაკეტო იერიშებს უამრავი ადამიანი, მათ შორის, მშვიდობიანი მოქალაქეები ეწირებიან. რამდენად რეალურია კონფლიქტის ამოწურვის შესაძლებლობა, ვის აწყობს არსებული მდგომარეობა და რა მიზანზეა ორიენტირებული ომი – ამის შესახებ „თბილისი თაიმსს“ ექსპერტი, მამუკა არეშიძე ესაუბრა.
ისრაელ-პალესტინის კონფლიქტის ამოწურვის უახლოეს პერსპექტივაზე რას იტყვით?
ცეცხლის შეწყვეტა განსაკუთრებულ სირთულეს არ წარმოადგენს. მით უმეტეს, რომ უამრავი დაინტერესებული მხარე გამოჩნდა ამ მხრივ. “ჰამასმა” თავისი თანხა გამოიმუშავა. “ჰამასს” მართლა პალესტინის პრობლემების მოგვარება კი არ უნდა. ის არსებობს იმისთვის, რომ საკუთარი აქტივობების გამო რაც შეიძლება მეტი თანხა მიიღოს. თავისი მისაღები თანხა მან უკვე გამოიმუშავა.
ვის ინტერესებში შედის ისრაელში კონფლიქტის გამწვავება?
პირველ ყოვლისა, ეს არის ყატარი. ჩვენ უნდა გავიგოთ ერთი რამ – პალესტინელების პრობლემა დედამიწის ზურგზე არავის აინტერესებს. ეს არის სამწუხარო აქსიომა. იმდენი თანხაა დახარჯული იმისთვის, რომ პალესტინური დასახლებები, ინფრასტრუქტურული თვალსაზრისით, წელში გაიმართოს, ვერ წარმოდიგენთ. ეს ფული იხარჯება სულ სხვა დანიშნულებით. ეს არის ერთი საკითხი.
მეორე საკითხია პოლიტიკური ისლამის თემა. პოლიტიკური ისლამი დღეს ცდილობს, რაც შეიძლება მაქსიმალური გავლენა მოიპოვოს მთელს მსოფლიოში. მისი მხარდამჭერია ისეთი ტიპის ქვეყნები, როგორიც არის ყატარი. თუმცა, არიან სხვა ქვეყნები, ორგანიზაციები, რომლებიც ასევე პოლიტიკური ისლამის მიმდევრები არიან.
რა არის მათი ამოცანა?
მათი ამოცანა არის, მთელს მსოფლიოში გამეფდეს ისლამური ხალიფატი. ხშირ შემთხვევაში ისინი „ნორმალური ისლამის’ მიმდევართა წინააღმდეგაც კი გამოდიან. არსებობს ასეთი პოლიტოლოგიური ტერმინი – “ზომიერი ისლამი”. არსებობს პოლიტიკური მოტივით რელიგიის გამოყენება. ეს შეიძლება, ქრისტიანობაც იყოს და სხვა რელიგიაც. ამ შემთხვევაში, საუბარია ისლამზე. მსგავსი ორგანიზაციები ევროპაშიც ფეხმოკიდებულია. ჩვენთანაც არსებობენ.
რა როლი აქვს, ამ მოცემულობაში, ისრაელს?
ისრაელი, რომელიც არის შუა ისლამურ სამყაროში, არის ხელისშემშლელი ფაქტორი, თუნდაც, ახლო აღმოსავლეთში. ამიტომ, ისრაელი უნდა განადგურდეს. ეს არის მათი ამოცანა. თუმცა, საქმე ის არის, რომ არაბული სამყაროს წარმომადგენლები ერთი ხელით რომ აბრახუნებენ, ისრაელი უნდა განადგურდესო, მეორე ხელით ისინი ინტენსიურად ვაჭრობენ ისრაელთან. განსაკუთრებით – ენერგომატარებლები. ისრაელი მყარი გადამხდელია და არის მათი პროდუქციის ფართო მომხმარებელი.
მასალა მოამზადა : მარიამ ტიელიძემ