უკულელე გამორჩეულად საინტერესო და სასურველი მუსიკალური ინსტრუმენტია არამხოლოდ მუსიკის მოყვარულებისა და მიმდევრევისთვის. ზოგადად, როდესაც ინსტრუმენტი მისი მფლობელის გემოვნებასა და სურვილებს ასახავს, მით უფრო პირადი ხდება ის მისთვის.
„ჩემი უკულელე“ სწორედ მსგავს, მფლობელის გემოვნებაზე მორგებულ საკრავს ქმნის.
სეით ივანიშვილი, „ჩემი უკულელეს“ დამფუძნებელი „თბილისი თაიმსს“ ესაუბრა.
„მე თვითონ პირველი უკულელე, დაახლოებით, რვა წლის წინ შევიძინე. ძალიან მინდოდა, ეს საკრავი ჩვენთანაც პოპულარული ყოფილიყო, ასევე, ხელმისაწვდომი ჩვენი საზოგადოებისთვის. იდეაც სწორედ აქედან გაჩნდა.
„ჩემი უკულელე“ დაახლოებით სამი წელია, არსებობს“, – აღნიშნავს ის.
როგორც სეითი ამბობს, აღნიშნული საკრავის დიზაინი მზადდება როგორც მისი, ასევე მომხმარებლის გემოვნებიდან გამომდინარე.
„ბუნებრივია, დიზაინი იქმნება მომხმარებლის მოთხოვნიდან გამომდინარე. მაგალითად, ძალიან პოპულარულია ვან გოგის, კლიმტის ნახატების გადმოტანა მათზე. სწორედ ამიტომაა ჩვენს უკულელეებზე დიდი მოთხოვნა – ვითვალისწინებთ მომხმარებლის სურვილებს“, – აღნიშნავს „ჩემი უკულელეს“ დამფუძნებელი და განმარტავს, რომ, უმეტესად, მომხმარებლები ახალგაზრდები არიან.
„მოთხოვნა თავიდანვე დიდი იყო. როცა მათი დამზადება დავიწყე, გამოხმაურება დიდი იყო. შეიძლება, ითქვას, ამ მხრივ წყვეტა არ ყოფილა. უფროსი თაობის წარმომადგენლებიც გვიკავშირდებიან მათ შესაძენად, მაგრამ უფრო მეტად უკულელეთი ახალგაზრდები არიან დაინტერესებულები“.
მასალა მოამზადა : მარიამ ტიელიძემ
