ნამდვილად ასეა, როდესაც საკუთარი საქმიანობა გიყვარს და მოქმედების თითოეული ეტაპი გაბედნიერებს, ეს შეუძლებელია, შეუმჩნეველი დარჩეს. “ბამო” სწორედაც რომ საკუთარი საქმის მოყვარულის წყვილის იდეებისა და ქმედებების შედეგია. თითოეული ნივთი, რომელიც მზადდება, დიდ ენერგიას, სითბოსა და სიყვარულს ატარებს.
დეტალებზე “თბილისი თაიმსს” “ბამო”-ს დამფუძნებელი, თეკა ჯამაკაშვილი ესაუბრა.
“საოცარია უკუკავშირი, როდესაც იღებ დადებით ემოციასა და სიხარულს შენი ნამუშევრის შეფასებისას, უამრავ მადლობას და აღტაცებად, რომელშიც დიდი სიყვარული ჩააქსოვე“
რამდენი ხანია, რაც „ბამო“ არსებობს?
“ბამო” არის ოჯახური სტარტაპი, სახელოსნო-საწარმო, სადაც იქმნება ორი ერთმანეთზე უზომოდ შეყვარებული წყვილის ხელნაკეთი ნივთები.
9 წელია, რაც მე და გიორგი ჩვენს პატარა და სიყვარულით გაჟღენთილ სახლში ყველაფერს საკუთარი ხელით ვქმნით… ყველაფერი ჩვენი ხელით იქმნება, იხატება, ეწყობა…
თავდაპირველად, დავიწყეთ ნაძვის ხეების დამზადება, ყოველ წელს სხვადასხვა დიზაინის ნაძვის ხეს ვქმნიდით და ეს იქცა ჩვენს საახალწლო ტრადიციად.
თავიდან, ჩვენს საყვარელ ადამიანებს, მეგობრებს ვჩუქნიდით და მათთვის ვქმნიდით დეკორს, სათამაშოებს, მათი ემოციებისა და მოწონების შემდეგ მივხვდით, რომ ეს საქმე გვაბედნიერებს და გადავწყვიტეთ, ეს სიყვარული სხვებისთვისაც გაგვეზიარებინა.
ასე შევქმენით ჩვენი ბრენდი •ბამო• რომელიც 2020 წლის დეკემბერში წარვუდგინეთ უფრო ფართო საზოგადოებას “ფეისბუქ” და “ინსტაგრამის” გვერდების საშუალებით.
უმთავრესად, რა მიზნებისთვის უკვეთენ მათ?
ჩვენი ნივთები თუ ავეჯი უმთავრესად იქმნება სასაჩუქრედ, საყვარელი ადამიანებისთვის, ასევე, საკუთარი სახლის ინტერიერის გასალამაზებლად.
მოგეხსენებათ, ჩვენ გვაქვს როგორც საბავშვო სათამაშო და დეკორი, ასევე, ავეჯი.
ჩვენი ნივთები შეიძლება, ერთდროულად ინტერიერის გასალამაზებლად და სათამაშოდ გამოიყენოთ, ეს განსაკუთრებულ ხიბლს სძენს მათ.
მათი დიზაინი ვისი იდეით მზადდება?
დიზაინი ერთობლივად იქმნება. ვფიქრობთ, ვაკეთებთ ესკიზსა და ჩანახატს, ამის შემდეგ გიორგი მუშაობს ხეზე, ასევე, ვაწყობთ ერთობლივად, საბოლოო შტრიხებს (შეღებვა, მოხატვა, დაფაქტურება), ძირითადად, მე ვასრულებ. თუმცა, აქაც ორივე ვინაწილებთ საყვარელ საქმეს.
გვაქვს განსხვავებული ხაზი – “ბამო სახლები”, რომელიც წლის ნებისმიერ სეზონზე სითბოსა და სიმყუდროვეს შემოიტანს სახლში.
გარდა სახლებისა, კიდევ რას ამზადებთ?
გვაქვს მასიური ხისგან დამზადებული ხელნაკეთი სათამაშოები, დეკორატიული ნივთები და ავეჯი.
გვაქვს საბავშვო ხაზი, ვქმნით მობაილებს, საქანელებსა და ჰამაკებს. განსხვავებული ფორმის თაროებს, სათამაშო თოჯინის სახლებს. დეკორატიული ფანქრები, რომელიც ერთდროულად ოთახის ფერად დეკორსა და ბავშვის სათამაშოს წარმოადგენს, ბავშვს ეხმარება ფერების მხიარულად შესწავლაში.
ასევე, ვამზადებთ რობოტებს, “ჩიტის ბუდე” სახლებს, დეკორატიულ ცხოველებს როგორც საბავშვო და ვინტაჟური სტილის, ასევე, “დრიფთვუდ არტის” სტილში (driftwood art) და ა.შ. რასაც ჩვენი ფანტაზია და მოხერხებულება გასწვდება.
საახალწლოდ ვამზადებთ ტრანსფორმერ ნაძვის ხეებს, რომელიც შეგიძლია, სურვილისამებრ შეცვალო და შექმნა საკუთარი დიზაინი.
მასალა მოამზადა : მარიამ ტიელიძემ
