საქართველოს ეროვნული ბანკი, ამ ეტაპზე. მუშაობს პროექტზე, რომელიც ციფრული ლარის გამოშვებას გულისხმობს. რას ნიშნავს ეს – რა უპირატესობები გააჩნია მომხმარებლებისთვის და რა მიზნებზე იქნება ორიენტირებული – ამის შესახებ “თბილისი თაიმსს” ექსპერტი, დავით კიკვიძე ესაუბრა.
“ციფრული ვალუტა არის, ფაქტობრივად, ლარის გაციფრულებული ვერსია, ოღონდ არა – ელექტრონული. ციფრული ვალუტა არის წმინდა ციფრულ ტექნოლოგიებზე აგებული ვალუტა, რომელიც არანაირ პირდაპირ კავშირში არ არის ეროვნულ ვალუტასთან. გამომცემელი, რა თქმა უნდა, არის ეროვნული ბანკი და ასეც დარჩენა, თუმცა, იგი განსხვავებული ფორმატით იქნება წარმოდგენილი.
ციფრული ვალუტის დამახასიათებლეი ნიშან-თვისება გახლავთ ის, რომ იგი აუცილებლად იქნება გარკვეულ ტექნოლოგიებზე დაყრდნობილი და ფინანსური ტექნოლოგიების მეშვეობით მოხდება მიმოქცევაში მისი ჩაშვება. მას არ ექნება მატერიალური ფორმა. რა თქმა უნდა, ღირებულების თვალსაზრისით ერთი ერთში იქნება, როგორც ჩვეულებრივი ლარი. თუმცა, ექნება მოხმარების განსხვავებული წესი – მხოლოდ ციფრული არხების მეშვეობით მოხდება მისი გამოყენება”, – აღნიშნავს კიკვიძე.
ექსპერტი ციფრული ვალუტის უპირატესობებზეც საუბრობს და განმარტავს, რო, ციფრული ვალუტის შემთხვევაში, მომხმარებლებს აღარ დასჭირდებათ კომერციული ბანკის შუამავლობა.
“მის მიმოქცევას არ ეყოლება შუამავლები, ე.წ. ფინანსური ინსტიტუტები. დღეს ჩვეულებრივ ელექტრონულ ფულს გააჩნია შუამავალი და ეს არის კომერციული ბანკი. ციფრული ლარის შემთხვევაში, ჩვენ უკვე ფიზიკურად აღარ დაგვჭირდება შუამავალი და გვექნება პირდაპირი ანგარიშსწორების შესაძლებლობა.
კიდევ ერთი დადებითი მხარე არის ის, რომ შუამავლების არარსებობა, თავის მხრივ, გამოიწვევს დანახარჯების შემცირებას იქედან გამმომდინარე, რომ ჩვენ ვიცით, ნებისმიერი ტიპის მომსახურებაში, ჩვეულებრივ, საბანკო საკომისიოები ფარულად არის დამალული და გათვალისწინებულია ფასებში. მეორე მხრივ, თვითონ ბანკსაც კი ვუხდით ჩვენ გარკვეულ საკომისიოებს იმისთვის, რომ ჩვენი ფული გარკვეულ ანგარიშებზე იყოს განთავსებული და ა.შ.
ციფრული ფულის შემთხვევაში მსგავსი ტრანზაქციული დანახარჯები მნიშვნელოვნად შემცირდება.
კიდევ ერთი საინტერესო თვისება აქვს ის, რომ იგი შეიძლება, კიდევ ერთი იარაღი იყოს ინფლაციის კონტროლისთვის ეროვნული ბანკისთვის, რადგან ჩვენ ვიცით, ინფლაციასთან ბრძოლის დროს ეროვნული ბანკი იყენებს თავის ინსტრუმენტებს. თითოეული მათგანის გამოყენებას სჭირდება გარკვეული დრო, რადგან ეს პროცესო მიმდინარეობს ბანკების მეშვეობით”, – განაცხადა დავით კიკვიძემ “თბილისი თაიმსთან” საუბრისას.
მასალა მოამადა : მარიამ ტიელიძემ
