„მეშახტეებს შევხვდი… მთავარი საკითხი, რაც მათ წამოაყენეს, ტურიზმის განვითარებაა“, – ამის შესახებ საქართველოს პრემიერ-მინისტრმა ირაკლი ღარიბაშვილმა ტყიბულში „ქართული ოცნების“ მერობის კანდიდატის წარდგენისას განაცხადა.
მისი თქმით, ტყიბულში ტურისტულად ახალი ლოკაციების შესწავლა და მიზიდულობის ცენტრებად გადაქცევა უნდა მოხდეს.
„ტყიბული – ეს ისტორიული ქალაქი გამორჩეულია თავისი სილამაზით, არაჩვეულებრივი ბუნებით და უზარმაზარი პოტენციალით ტურიზმის განსავითარებლად. ახლახან მეშახტეებს შევხვდი, განვიხილეთ რამდენიმე საკითხი. მათ ვუთხარი და ადგილზე გადავუწყვიტეთ საკითხები და ერთ-ერთი მთავარი საკითხი, რაც მათი მხრიდან იქნა წამოყენებული სწორედ ტურიზმის განვითარებაა.
ცხრაჯვარის პროექტი – აქტიურად ვმუშაობთ და აუცილებლად გაკეთდება. სხვა ლოკაციებს შევისწავლით და აუცილებლად გავაკეთებთ ახალ მიზიდულობის ცენტრებს იმისთვის, რომ ტყიბულში რაც შეიძლება მეტი დამსვენებელი ჩამოვიდეს, მეტმა ნახოს – როგორც ადგილობრივმა, ისე უცხოელმა ტურისტმა“, – განაცხადა პრემიერ-მინისტრმა.
