“ახლა უკვე იმ ეტაპზე ვარ, რომ მეც მჯერა, რომ ყველაფერი კარგად დასრულდება”,- ამის შესახებ თინა ხიდაშელმა “მთავარი არხის” ეთერში განაცხადა. მან ისაუბრა იმაზე თუ როგორ გაიმარჯვა კოვიდ 19-ზე.
“ძალიან დიდი ხანი არ დაჭირდება ამ პროცესს, თუმცა ამის დაჯერების ფაზა სულ ცოტა ხნის წინ დადგა. გადაპარსული თავი მეც მომეწონებოდა სხვა მიზეზით, რომ გადამეპარსა, სტილიტის რჩევით ან რაიმე სხვა მიზეზით,მაგრამ იმედია, ამასაც ეშველება და ყველაფერი ნორმალურად დასრულდება, უკვე შვიდი თვე სრულდება და მჭირდება ფიზიკური რეაბილიტაცია.
რთულია 7 თვე შენს თავს შეძახილის მდგომარეობამდე ამყოფებდე, არ უნდა დაეცე, არ უნდა დამარცხდე, არ უნდა დანდებდე, სულ კარგ ხასიათზე უნდა იყო, სხვებისთვის, შენი ოჯახის წევრებისთვის, რომ ეს სიმძიმე არ გავრცელდეს და ყველა ამ უბედურების ნაწილი არ იყოს. იმედია, მალე გაივლის ეს პერიოდი და დამოუკიდებლად ვივლი, ჩართვით აღარ ვიქნები და სტუდიაში მოსვლას შევძლებ”,- განაცხადა თინა ხიდაშელმა.
მან კიდევ ერთხელ გაიხსენა კოვიდინფიცირების ისტორია. მას ვირუსი 15 თებერვალს დაუდასტურდა და როგორც თავად ამბობს, სწორედ ის იყო ოჯახის სხვა წევრების დაინფიცირების წყარო.
“თუკი არსებობდა რაიმე სახის რეკომენდაცია ვინმეს მიერ გაცემული, ქართველების, ამერიკელების, ვისიც გნებავთ, აბსოლუტურად ყველა წესის დაცვით ვცხოვრობდით მე და ჩემი ოჯახის წევრები იმ მომენტისთვის. ონლაინ რეჟიმში ვიყავი და მხოლოდ ერთი საათით მომიწია სახლიდან გასვლა და როგორც ჩანს, ვიღაცასთან კონტაქტში მოხდა ამ დროს ჩემი დაინფიცირება, ასე დაიწყო ეს ყველაფერი შვიდი თვის უკან… სამწუხაროდ, მაშინ აცრა არ არსებობდა საქართველოში, ოჯახში იმასაც კი ვსაუბრობდით, სადმე ხომ არ წავსულიყავით ასაცრელად, თუ აცრა ჩვენს ქვეყანაში არ შემოვიდოდა. შემდეგ, როდესაც გერმანიაში სარეაბილიტაციო კურსზე ვიყავი, იქ ამცრეს პირველად”, – ამბობს ხიდაშელი.
ის ვაქცინაციის საკითხსაც გამოეხმაურა და მიმართა იმ ადამიანებს, ვისაც აცრის მიმართ სკეპტიკური დამოკიდებულება აქვს.
“არცერთი წამით მაყურებელს არ მინდა შთაბეჭდილება დარჩეს, რომ პირბადე არ არის მნიშვნელოვანი ან სხვა წესების დაცვა, მაგრამ აბსოლუტური გარანტია იმისი, რომ არ შეგვეყრება ვირუსი და რაც ყველაზე მთავარია, თუ შეგვეყარა და ცოცხალი გადავრჩებით, ამის აბსოლუტურ გარანტიას აცრის გარდა, ვერავინ ვერ იძლევა. გასაგებია, რომ აცრა ვირუსისგან ვერ გვიცავს და ამცირებს ალბათობას, რომ ვირუსის ადვილად გადაცემა მოხდეს, მაგრამ მე ყველას ჩემს ირგვლივ, ვისთანაც მისაუბრია ამ თემაზე, ყველას ერთს ვეუბნები, ვინც სკეპტიკურად არის განწყობილი – ერთადერთი კითხვა დაუსვან საკუთარ თავს, არა ის თუ ვირუსი შეეყრება თუ არა, ეს საერთოდ, არარელევანტური შეკითხვაა, არამედ ის თუ ცოცხლები გადარჩებიან თუ არა თვითონ, არა ვიღაცის გადასარჩენად, მეგობრის თუ მეზობლის.
ადამიანებს საკუთარი სიცოცხლე თუ არაფრად მიაჩნიათ ძალიან რთული წარმოსადგენია ამ რიტორიკას დაექვემდებაროს, რომ შენი თავი თუ არ გადარდებს სხვებზე მაინც იდარდე.
ჩვენ ყველამ ჩვენს თავს ეს უნდა ვკითხოთ, სანამ საბოლოო გადაწყვეტილებას მივიღებთ აცრასთან დაკავშირებით, გვინდა თუ არა, გვიღირს თუ არა სიცოცხლის რისკის ქვეშ დაყენება ან სულ მინიმუმ იმ ტანჯვის წინაშე საკუთარი თავის დაყენება, იმ ჯოჯოხეთის გამოვლა, რომელიც ძალიან ბევრმა ჩვენგანმა გაიარა ამ ინფიცირების პროცესში”,- აცხადებს თინა ხიდაშელი
