“საერთაშორისო სივრცესთან ინტეგრაციის კიდევ ერთი წინ გადადგმული ნაბიჯი” – ამის შესახებ საბანკო პროდუქტების ექსპერტი, დავით კიკვიძე სოციალურ ქსელში წერს. ექსპერტი მსოფლიოში ერთერთი ყველაზე დიდი პლატფორმისა და, ამ ჭრილში, საქართველოსთვის არსებულ შესაძლებლობებზე ‘“თბილისი თაიმსს” ესაუბრა,
“Finnovating არის მსოფლიოში ერთერთი ყველაზე დიდი პლატფორმა, სადაც გაერთიანებულია მსოფლიოს წამყვანი ფინტექ ორგანიზაციები. დღესდღეობით ის ითვლის, დაახლოებით, 50 000-ზე მეტ კომპანიას, რომელიც ამ პლატფორმაზეა დარეგისტრირებული. გარდა ამისა, თვითონ ეს პლატოფრმა ითვალისწინებს შემდეგს – ამ ორგანიზაციებს აქვთ შესაძლებლობა, ერთმანეთში გაცვალონ ინფორმაციები, დაუკავშირდნენ და გაიზიარონ ერთმანეთის გამოცდილება. ასევე, პლატფორმა იძლევა შესაძლებლობას, რომ არა მხოლოდ დაუკავშირდნენ ერთმანეთს, არამედ ეს კომპანიები იყვნენ ერთმანეთის კლიენტები, პარტნიორები, გაცვალონ ინფორმაციები ახალი სერვისების შესახებ”, – აღნიშნავს ექსპერტი.
როგორც ის ამბობს, ეს საქართველოსთვის არის შესაძლებლობა, საერთაშორისო ბაზრებთან ჰქონდეს წვდომა.
“ეს საქართველოსთვის არის ძალიან დიდი შესაძლებლობა იმიტომ, რომ ჩვენს, ქართულ კომპანიებს მიეცეთ წვდომა საერთაშორისო ბაზრებთან, ჰქონდეთ შესაძლებლობა საერთაშორისი კომპანიებთან დაკავშირების, მსოფლიოს ბაზრებზე გაყიდონ საკუთარი პროდუქტი. მეორე მხრივ კი, გაიზიარონ მათი გამოცდილება, დაინახონ – როგორ მუშაობს ევროპა, რა ბიზნესმოდელებია და წამოიღონ მათთვის საინტერესო ინფორმაცია – ასევე, პირიქით.
გარდა ამისა, ეს დიდი შესაძლებლობაა იმ კუთხითაც, რომ თვითონ საერთაშორისო ორგანიზაციები და ინვესტორები დავაინტერესოთ ქართული ბაზრით, ვაჩვენოთ – რა ხდება საქართველოში, როგორ ვითარდება ფინტექ სფერო და, თავისთავად, გამოვიწვიოთ ინვესტორების ინტერესი”, – განმარტავს დავით კიკვიძე “თბილისი თაიმსთან” საუბრისას.
მასალა მოამზადა : მარიამ ტიელიძემ
