2021 წლის ადგილობრივი თვითმმართველობის არჩევნებამდე სულ უფრო ცოტა დრო რჩება და პოლიტიკური დაძაბულობა მაქსიმალურად იმატებს. გასაკვირი არ არის, რომ პოლიტიკური პარტიები ცდილობენ საკუთარი ხმა ძლიერად და ხარისხიანად მიაწოდონ ამომრჩეველს და ამისთვის არაერთ გზას იყენებენ, როგორც წესი, ამ საქმეში მოწინავე ადგილს მედია და მისი სახეები იკავებს.
პარტიების დაკვეთით წინასაარჩევნო ვიდეო-რგოლებს ვხვდებით თითქმის ყველა ქართულ ძირითად არხზე. მიუხედავად იმისა, რომ საქართველოში არსებობს, როგორც სახელისუფლებო, ასევე ოპოზიციური ტელევიზიები, კანონის შესაბამისად, მათ უწევთ, რომ კოდექსითგანსაზღვრული უფასო პოლიტიკური რეკლამები განათავსონ საკუთარ სატელევიზიო ბადეში. რეალურად, მასობრივი ინფორმაციის საშუალებებს საქართველოში ყოველდღიურად ათი ათასობით და მეტი ადამიანი მოიხმარს, შესაბამისად პოლიტიკური პარტიისა თუ ცალკეული პირის პოპულარიზაციისთვის მედია მართლაც დადებით როლს თამაშობს. ბოლო პერიოდში, სხვადასხვა არხზე გამოჩნდა არაერთი ახალი პოლიტიკური ხასიათის თოქ-შოუ, რომელიც პოლიტიკოსებს საშუალებას აძლევს ღიად დააფიქსირონ საკუთარი მოსაზრება ამა თუ იმ საკითხის გარშემო, მიმართონ მაყურებელს და ა.შ. მედიის პოლარიზაციის ხარისხი საქართველოში მართლაც მაღალია, რაც მტკიცედ სახელისუფლებო და ოპოზიციური პარტიების არსებობითა და მათი ურთიერთდამოკიდებულებით აიხსნება.
წინასაარჩევნო გარემოზე ტელევიზიების გარდა მნიშვნელოვან გავლენას ახდენს სოციალური მედიაც, ამიტომაც გასაკვირი არაა, რომ სოციალური მედიის მონიტორინგი ხშირად ხორციელდება სხვადასხვა არასამთავრობო ორგანიზაციის მხრიდან. როგორც ტელევიზიები, ისე სოციალური მედია ხშირად ხდება ყალბი ინფორმაციის გავრცელებისა პროპაგანდის წყარო, რისი ამოცნობაც, დაუკვირვებელი თვალით არცთუისე მარტივია, შესაბამისად ხშირია შემთხვევა, როცა ათობით ამომრჩეველს ებნევა თავგზა.
სოციალურ მედიაში ამ მხრივ სურათი მართლაც მძიმეა, ტელევიზიებისგან განსხვავებით აქ ღვარძლის, შურისა და სიძულვილის ტირაჟირება უფრო ხშირად და მკაფიოდ ხდება, რისი გაკონტროლებაც ძალზე რთულია. ყოფილა შემთხვევები, როცა სოციალური ქსელების ადმინისტრაციას თავადვე დაუბლოკავს მსგავსი ტიპის გვერდები თუ ჯგუფები. სოციალურ მედიას შეუძლია ზეგავლენა იქონიოს ამომრჩევლის პოლიტიკურ გემოვნებაზე, შეხედულებებსა და ფასეულობებზე, სწორედ ამიტომ ანიჭებს მას სხვადასხვა პოლიტიკურ ძალა დიდ მნიშვნელობას.
ალბათ, მხოლოდ ეს კვლევაც დაგვარწმუნებს სოციალური მედიის ძალაში. არასამთავრობო ორგანიზაცია „სამართლიანი არჩევნების“ სოციალური მედიის მონიტორინგის პირველი შუალედური ანგარიშის მიხედვით:• პარტია „ქართული ოცნების“ წინააღმდეგ ორკესტრირებულად მოქმედებდა 20 ფეისბუქგვერდი• ოპოზიციური პარტიების წინააღმდეგ 25 გვერდი მოქმედებდა• 2021 წლის წინასაარჩევნო პერიოდში გააქტიურდა რამდენიმე გვერდი, რომელიც მოქმედებდა ხელისუფლების მიმართ კრიტიკულად განწყობილი მედიასაშუალებების წინააღმდეგ.
მასალა მოამზადა: თორნიკე ყრუაშვილმა
