ერთი შეხედვით მუდამ მხიარული ჯამბაზი შესაძლოა, სულაც არ იყოს მუდამ მხიარული. ბავშვებს ის ძალიან უყვართ. ფერადი, სასაცილო, ხალისიანი – როგორ შეიძლება, ვინმეს ჯამბაზის დანახვა არ უხაროდეს.
ჩვეულებრივ, ის საცირკო კომიკოსია. მხოლოდ ჯამბაზისთვის დამახასიათებელი ვიზუალი არა მხოლოდ ბავშვებს, არამედ მოზარდებსაც ართობს. მათ წითელი ცხვირი აქვთ და ფერადი ტანსაცმელი აცვიათ.
თვითონ სიტყვა „ჯამბაზი“ სპარსული წარმომავლობისაა და ასე განიმარტება – სიტყვა „jan“ ნიშნავს „სულს“, ხოლო „bazz“ – „მოთამაშეს“.
იცით თუ არა, რომ… წითელ ცხვირს თავისი განმარტება აქვს – თურმე, ადრე „ჯამბაზი“ ალკოჰოლის მომხმარებელ, ღარიბ ადამიანს ეწოდებოდა.
თოკზე მოსიარულე ამ ფერად ადამიანებს იდუმალი შინაგანი სამყარო აქვთ. ერთი შეხედვით, თითქოს, მათ სადარდებელი არაფერი აქვთ. მაგრამ დაკვირვებიხართ მათ თვალებს? უკიდეგანო, ამოუხსნელი გამოხედვა, რომელიც იტევს ამბებს, სათქმელს, სადარდებელს.
ჰაინრიხ ჰაინეს უთქვამს – „როდესაც გმირები გადიან, არენაზე ჯამბაზები შემოდიანო“.
დღეს უკვე არაერთი ფილმი არსებობს მათ შესახებ, ლიტერატურაშიც ვხვდებით. ალბათ, ჯამბაზი ასეთი უნდა იყოს – მხიარული და თანაც სევდიანი, გულახდილი და თან იდუმალი, კარგი მეგობარი, მესაიდუმლე – ამიტომაც მოსწონთ ბავშვებს ისინი.
მასალა მოამზადა : მარიამ ტიელიძემ
