ადგილობრივი თვითმმართველობის არჩევნებამდე სულ ცოტა დრო რჩება. პოლიტიკური პარტიების ნაწილი წინასაარჩევნო კამპანიით არის დაკავებული, სხვები კი უპირატესობას დესტაბილიზაციას ანიჭებენ. როგორც საზოგადოებისთვის უკვე ცნობილია, გავრცელდა ინფორმაცია ე.წ. ფარულ ჩანაწერებთან დაკავშირებით.
საკითხს “თბილისი თაიმსთან” საუბრისას ანალიტიკოსი, ზაალ ანჯაფარიძე გამოეხმაურა.
“რა თქმა უნდა, გვეერდს ვერ ავუვლით შემდეგ საკითხს – ვგულისხმობ ე.წ. კომპრომატების ომს, რომელიც ვიხილეთ არჩევნებამდე ორი კვირით ადრე, ცხადია, ამ ყველაფერმა შეცვალა წინასაარჩევნო გარემო, უფრო დაამძიმა ის და, შესაბამისად, უნდა ვივარაუდოთ, რომ ეს გარკვეულ ზეგავლენას იქონიებს, ალბათ, არჩევნების შედეგებზე. თუმცა, არ მგონია, დიდად იმოქმედოს, რადგან საზოგადოების მხრიდან მყისიერი პროტესტი არ ყოფილა, რომ, მაგალითად, ისინი ქუჩებში გამოსულიყვნენ და გაეპროტესტებინათ, როგორც ეს იყო 2012 წელს ციხის კადრების გასაჯაროების შემთხვევაში.
როგორც ჩანს, რადგან ამის უკან, მათ თვალში, მათ აღქმაში მაინც დგას ოპოზიცია და “ნაციონალური მოძრაობა”, რომელიც თავად იყო დაკავშირებული ფარულ ჩანაწერებთან საკუთარი მმართველობის დროს, ე.წ. კომპრომატების მიმართ არ არის ნდობა მოსახლეობის მხრიდან”, – განმარტავს ანჯაფარიძე.
როგორც ანალიტიკოსი აღნიშნავს, ეუთო/ოდირ-ის სადამკვირვებლო მისიის მხრიდან მკვეთრი კრიტიკა, ჯერჯერობით, არ ყოფილა.
“მინდა, ხაზი გავუსვა კიდევ ერთ გარემოებას – ბოლო შუალედურ შეფასებაში ეუთო/ოდირ-ის სადამკვირვებლო მისიის მხრიდან, მიუხედავად იმისა, რომ არის გარკვეული შენიშვნები, ხაზგასმულია, რომ მედია გარემო არის პლურალისტური და ყველას შეუძლია საკუთარი პოზიციების დაფიქსირება. მათი შეფასებით, საარჩევნო პროცესები მშვიდ გარემოში მიმდინარეობს, ცალკეული ინციდენტებს თუ არ მივიღებთ მხედველობაში. ჯერჯერობით, მკვეთრი კრიტიკა მათ არ გამოუხატავთ, განსხვავებით იმ არასამტავრობო ორგანიზაციებისგან, რომლებიც, შეიძლება ითქვას, ე.წ. სიტუაციური მოკავშირეები არიან ოპოზიციისთვის და ყველანაირად ცდილობენ, საზოგადოებაში გააჩინონ უნდობლობა არჩევნების მიმართ”, – ამბობს ზაალ ანჯაფარიძე “თბილისი თაიმსთან” საუბრისას.
მასალა მოამადა : მარიამ ტიელიძემ
