ბიზნესი, რომლის საწყისიც ბავშვების სიყვარულია. მარიამ მჭედლიშვილმა სწორედ ამ მიზეზით დაიწყო საქმიანობა, რომელიც ბალიშების დამზადებას გულისხმობს. ფერადი, ხალისიანი, მრავალფეროვანი ნამუშევრები თითოეული მომხმარებლისთვის ემოციებთან არის დაკავშირებული, რადგან ისინი ინდივიდურად იქმნება – იმის მიხედვით, ვის რა გემოვნება და ასოციაციები აქვს.
მარიამი “თბილისი თაიმსს” თავად ესაუბრა.
იდეის შესახებ მოგვიყევით – საიდან გაჩნდა ის?
დავიწყოთ იქედან, რომ ძალიან მიყვარს ბავშვები. ამიტომ, მომავალი საქმეც მინდოდა მათთან დამეკავშირებინა დავიწყე ფიქრი თუ რა აბედნიერებდათ მათ. მივხვდი, რომ მოსწონთ ჩახუტება, ფუმფულა – რბილი საგნები, უყვართ მულტფილმები და მათი გმირები, და კიდევ უფრო მეტად მათთან ერთად ძილი უყვართ. მივხვდი, რომ ამ ყველაფერს ბალიში აერთიანებდა. ამიტომ, დიდი სიამოვნებით დავიწყე მათი შექმნა.
მხოლოდ ბავშვებისთვის ქმნით მათ?
დიახ, მხოლოდ საბავშვო ილუსტრაციები გვაქვს , თუმცა, ნელ-ნელა ვამატებთ ინდივიდუალურ შეკვეთებსაც.
ძირითადად, რა მიზნით ყიდულობენ თქვენს პროდუქტს?
უმეტესად, ბავშვების გასახარებლად, თუმცა, დეკორაციისთვისაც ხშირად იყენებენ. ასევე, ჩვენი ბალიშების ხშირი მომხმარებლები არიან ზრდასრულები, რომლებიც დიდი მელანქოლიით ყიდულობენ მათი ბავშვიბის დროინდელ, ნახატებიან ბალიშებს.
თქვენი ნამუშევრები რაიმე განსაკუთრებულმოვლას საჭიროებს?
განსაკუთრებულ მოვლას არ საჭიროებს, რადგან უმაღლესი ხარისხის მასალებისგან მზადდება. ბავშვები ხშირად ალაგებენ ნივთებს დაბლა, ამიტომაც, ჩვენი ბალიშები ირეცხება სარეცხის მანქანაში. დედიკოებს დროს ვუზოგავთ და მათაც ვუქმნით კომფორტს მაქსიმალურად.
მასალა მოამზადა : მარიამ ტიელიძემ
