დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, მეორე აცრიდან 6 თვის შემდეგ მესამე, ე.წ. ბუსტერ დოზის გამოყენების საჭიროებას განიხილავენ.
მისივე თქმით, აღნიშნულ საკითხზე გადაწყვეტილებას მას შემდეგ მიიღებენ, რაც ორჯერადად ვაქცინირებული პირების რაოდენობა გარკვეულ ზღვარს მიაღწევს.
“დაავადებათა კონტროლის ეროვნული ცენტრის მოსაზრებაც და რეკომენდაციაც არის, რომ ჩვენ დაგვჭირდება ბუსტერ ანუ მესამე დოზა, მეორე აცრიდან 6 თვის შემდეგ, მაგრამ ეს საკითხი უნდა განვიხილოთ და გადავწყვიტოთ მას შემდეგ, რაც გარკვეულ ზღვარზე ავალთ ორჯერადი ვაქცინაციის. ამაზე ჩვენ არ დაველოდებით ჯანდაცვის მსოფლიო ორგანიზაციის გადაწყვეტილებას, ეს თვითონ ქვეყნის გადასაწყვეტია. ამაზე მსჯელობს სამეცნიერო კომიტეტი და ვფიქრობ მალე იქნება შესაბამისი გადაწყვეტილება და შემდეგ იმუნიზაციის საბჭო მიიღებს გადაწყვეტილებას”, – განაცხადა გამყრელიძემ.
როგორც მან აღნიშნა, ზოგადად, ე.წ. ბუსტერ დოზა საჭირო გახდება.
