მიხეილ სააკაშვილის დაკავებას, ქართული ოცნების ერთ-ერთი ლიდერი მამუკა მდინარაძე ეხმიანება. მისი შეფასებით, ეს იყო მაღალი კლასის, უდიდესი წარმატებით ჩატარებული სპეცოპერაცია.
მისივე განმარტებით, „უდიდესი ავანტიურისტის მიხეილ სააკაშვილის მხრიდან იგეგმებოდა პროვოკაცია, რომელიც საბედნიეროდ აღიკვეთა“.
მან განმარტა, თუ რატომ უარყოფდნენ დღეს მმართველი გუნდის წარმომადგენლები მთელი დღის განმავლობაში მიხეილ სააკაშვილის საქართველოში დაბრუნებას.
„კარგად ხვდებით, რომ ეს იყო უდიდესი პროვოკაცია, რომელიც იგეგმებოდა ყველაზე დიდი ავანტიურისტის, მიხეილ სააკაშვილის მხრიდან და საბედნიეროდ, ის აღიკვეთა.
ალიან დიდი მადლობა საქართველოს სამართალდამცავ უწყებებს, რომლებმაც უდიდესი პროვოკაცია აღკვეთეს. როდესაც ყველაფერი ნათელი ხდება, ალბათ კარგად ხვდებით, რომ ეს იყო უდიდესი პროვოკაცია, რომელიც იგეგმებოდა ყველაზე დიდი ავანტიურისტის, მიხეილ სააკაშვილის მხრიდან და საბედნიეროდ, ის აღიკვეთა. ამ მაღალი კლასით შესრულებულ სპეცოპერაციასთან დაკავშირებით ბუნებრივია, სამართალდამცავებს მადლობა უნდა გადავუხადოთ. რაც შეეხება ხვალინდელ დღეს, დარწმუნებული ვარ, „ქართული ოცნების“ ყველა ამომრჩეველი, ვინც აპირებდა ან არ აპირებდა არჩევნებზე მისვლას, ამ უდიდესი პროვოკაციის პასუხად, ასევე უპასუხებენ ჩვენი მომხრეები და ის მოქალაქეები, რომლებიც ამ ყველაფერს კარგად ხედავენ.
ჩვენი განცხადებები ეყრდნობა იმ ინფორმაციას, რასაც სამართალდამცავები გვაწვდიდნენ. მათ მიერ მოწოდებული ინფორმაციები საერთო კონტექსტში ჩატარებულ სპეცოპერაციასთან და მის შედეგებთან ერთად, ნიშნავს იმას, რომ ეს იყო მართლაც მაღალი კლასის, უდიდესი წარმატებით ჩატარებული სპეცოპერაცია ჩვენი მხრიდან, მათ ეს ძალიან კარგად გათვალეს, სხვაგვარი მესიჯები რომ გახმოვანებულიყო, ბუნებრივია, ოპერაცია ასეთი წარმატებით შეიძლება ვერ დასრულებულიყო, მათ ეს რისკი არ გაწიეს“,-განაცხადა მდინარაძემ.
მისი შეფასებით, „მიხეილ სააკაშვილი დამფრთხალია, მან გარისკა და ეს რისკი ძვირად დაუჯდა“.
„ეს იყო კარგად ჩატარებული სპეცოპერაციის კლასი. მსჯავრდებული, ძებნილი მიხეილ სააკაშვილი ამ ყველაფრის შედეგად არის ციხეში, იქ, სადაც უნდა იყოს“,-განაცხადა მდინარაძემ.
