ვაკვირდებით, რომ მიდის პირდაპირი შეტევა საუბნო-საარჩევნო კომისიებზე. იყო მცდელობები და გეგმები, რომ ჩაეშალათ დათვლის პროცესი. ვხედავთ, განსაკუთრებით რა ხდება ზუგდიდში. ასეთივე სიტუაციაა ბევრ სხვა უბანზე – არის პირდაპირი მცდელობა, რომ უბანზე რამენაირად ჩაშალონ ხმის დათვლის შესაძლებლობები, – ამის შესახებ პარტიის ოფისში გამართულ ბრიფინგზე „ქართული ოცნების“ საზოგადოებასთან ურთიერთობის მდივანმა შალვა პაპუაშვილმა განაცხადა.
მან „ნაციონალურ მოძრაობას“ მიმართა, რომ შეეშვან ზეწოლას.
„ასევე მიდის შეტევა ჩვენს ვებგვერდზე, სადაც პარალელური დათვლის შედეგების გამოქვეყნება ხდება. არის პირდაპირ ჰაკერული შეტევა, რათა გატეხონ სერვერი. ნახევრ მილიონზე მეტი მოთხოვნაა გაგზავნილი სხვადასხვა ქვეყნიდან – ეს პირდაპირ მიუთითებს, რომ არის კოორდინირებული მოქმედება როგორც უბნებსა და ოლქებში, ისე ვირტუალურ სივრცეში. ამიტომ უპირველეს ყოვლისა, მივმართავთ „ნაციონალურ მოძრაობას“, რომ მათ არ გაუვათ ხმის დათვლის პროცესის ჩაშლა“, – განაცხადა შალვა პაპუაშვილმა.
მისივე თქმით, ისინი მიმართავენ შინაგან საქმეთა სამინისტროს, დაინტერესდეს ამ საკითხით.
„გარდა ამისა, მივმართავთ საერთაშორისო დამკვირვებლებს, რომ მათ იფხიზლონ და ამასთან დაკავშირებით განსაკუთრებული სიმკაცრე გამოიჩინონ „ნაციონალური მოძრაობის“ მიმართ“, – განაცხადა პაპუაშვილმა.
