ცოტახნის წინ ცნობილი გახდა ერთი სიახლის შესახებ – Taxiwoman გახლავთ ტაქსის გამოძახების ახალი სერვისი, რომელიც მხოლოდ ქალებისა და 16 წლამდე ახალგაზრდებისთვისაა ხელმისაწვდომი. ამასთან, დასაქმებულებიც მხოლოს მდედრობითი სქესის წარმომადგენლები არიან.
აღნიშნულს საზოგადოებაში აზრთა სხვადასხვაობა მოჰყვა. ფაქტის მომხრეები და მოწინააღმდეგეები ერთმანეთს საკუთარი არგუმენტების სისწორეში არწმუნებენ. საკითხს გენდერისტი, მარი მესხი “თბილისი თაიმსთან” საუბრისას გამოეხმაურა.
“მოდით, ეს ფაქტი ორ ასპექტში შევაფასოთ. პირველი, რომ აქ მხოლოდ ქალები იქნებიან დასაქმებულები, გამომდინარეობს იქედან, რომ პროფილი ექნებათ ქალებისა და არასრულწლოვნების მომსახურების. იმაში, რომ ქალები იქნებიან დასაქმებულები, მე საწინააღმდეგოს ვერაფერს ვხედავ. რაც უფრო მეტი ქალი დასაქმდება, ამას უარყოფითად ვერაფრით შევაფასებ. ეს იმიტომ, რომ, ზოგადად, ქალებისა და მამაკაცების დასაქმებაზე ხელმისაწვდომობას მე არ ვაფასებ, როგორც თანაბარსა და თანასწორს. აქედან გამომდინარე, ამ ასპექტში ჩანაფიქრს, დასაქმების თვალსაზრისით, მე მივესალმები,
რაც შეეხება მეორე ასპექტს, რომ აღნიშნული სერვისი მოემსახურება ქალებსა და არასრულწლოვნებს. არასრულწლოვნებთან მიმართებით შეიძლება, ვთქვათ, რომ გამართლებულია, მაგრამ ის, რომ მხოლოდ ქალებისთვის იქნება ხელმისაწვდომი, უსვამს ხაზს იმ საშიშ გარემოებას, რომ, ხშირ შემთხვევაში, ქალი მგზავრები არ არიან დაცულები. ჩვენ გვაქვს უამრავი ფაქტი, რომ, მაგალითად, გაძარცვეს, იძალადეს, გააუპატიურეს და ა.შ”, – აღნიშნავს მესხი.
როგორც რესპონდენტი განმარტავს, ზემოხსენებული სიახლე ხაზს უსვამს, რომ ქალი მგზავრები დაცულებიარ არიან.
“საერთო ჭრილში რომ შევხედოთ, მე ვიზიარებ ამ სეპარირების მოწინააღმდგეთა პოზიციას, რადგან, რომ შევაჯამო, არ მიმაჩნია გამართლებულად, რომ მხოლოდ ქალებს უნდა ემსახურებოდეს.
ზოგადად, ეს ყველაფერი ხაზს უსვამს ერთ ძალიან საშიშ ფაქტორს და გამომდინარეობს აქედან – არ არიან დაცულები ქალი მგზავრები და ეს უნდა უზრუნველყოს სახელმწიფომ. ეს ნამდვილად ძალიან საგანგაშო სიგნალია. ქალს უნდა შეეძლოს თავისუფლად გადაადგილება დღის ნებისმიერ მონაკვეთში და იმ ტრანსპორტით, რასაც ის მიიჩნევს საჭიროდ.
თუმცა, ეს სიახლე არ არის გამოსავალი ქალების დაცულობისთვის. საბოლოოდ, სახელმწიფოს ერთერთი ვალდებულება არის ის, რომ მოსახლეობამ თავი იგრძნოს უსაფრთხოდ”, – ამბობს მარი მესხი”თბილისი თაიმსთან” საუბრისას.
მასალა მოამზადა : მარიამ ტიელიძემ
