2021 წელს დაფუძნდა სოციალური საწარმო “დედიკო“. მის უმთავრეს საქმიანობას მოწყვლადი ჯგუფების ქალთა გაძლიერება წარმოადგენს. აღნიშნული პროექტის მიზანია, დაეხმაროს მარტოხელა დედებს რეალიზებაში, სამუშაო და საცხოვრებელი პირობების შექმნაში.
დეტალებზე “თბილისი თაიმსს” ფონდ “კონსტანტას” გამგეობის თავმჯდომარე, თამარ ლებანიძე ესაუბრა.
“ფონდი “კონსტანტა” არსებობს 1997 წლიდან და ის არის ძალიან დიდი ისტორიის მქონე – იყო პირველი მიკროსაფინანსო ორგანიზაცია. შემდეგ დააარსა ბანკი “კონსტანტა”. ამ პერიოდის განმავლობაში, ფონდის ძირითადი პროექტები იყო მცირე მეწარმეების მხარდაჭერა და, განსაკუთრებით, მეწარმე ქალების.
2021 წელს კი, ფონდის მიერ, დაფუძნდა სოციალური საწარმო “დედიკო”, – აღნინავს ლებანიძე.
რესპონდენტი საწარმოს მთავარ მიზნებსა და ამოცანებზე საუბრობს.
“საწარმოს მიზანი გახლავთ მარტოხელა დედების მხარდაჭერა და ის ითვალისწინებს მათთვის დასაქმების შესაძლებლობების შექმნას, ასევე, მათთვის სასურველი სერვისების მიწოდებას, როგორიც არის ტრენინგი, შესაძლებელია ფსიქოლოგიური დახმარება და ა.შ.
გამომდინარე იქედან, რომ საწარმო ჯერ მხოლოდ მაისში დასაქმდა, შედეგებზე საუბარი რთულია. აქ, ამ ეტაპზე, ოთხი ქალბატონია დასაქმებული. თუმცა, ის, რომ უკვე სამი თვის განმავლობაში ამ ქალბატონებს აქვთ შესაძლებლობა, მიიღონ უწყვეტი შემოსავალი და, შესაბამისად, უკეთესი პირობები შეუქმნან საკუთარ თავსა და შვილებს, ეს საკმაო შედეგები.
ჩვენ ვეძებთ შესაძლებლობებს, რომ გაძლიერდეს საწარმო და უფრო მეტ ქალბატონს ჰქონდეს შესაძლებლობა, მიეწოდოს სხვადასხვა, საჭირო სერვისი”, – ამბობს თამარ ლებანიძე “თბილისი თაიმსთან” საუბრისას.
მასალა მოამზადა : მარიამ ტიელიძემ
