ადამიანისთვის ის გარემოა საუკეთესო, რომელიც მის ხასიათსა და გემოვნებას მაქსიმალურად შეესაბამება. ძალიან საინტერესო და სასიამოვნოა, როდესაც ჩვენ თავად ვიღებთ მონაწილეობას იმის შექმნაში, რაც ჩვენი ყოველდღიურობაა.
„კერა“ სწორედაც რომ ყოველი ადამიანის პირად სურვილებსა და გემოვნებაზეა ორიენტირებული. ის ქმნის ნივთებს, რომლებიც ჩვენს სამყაროს ავსებს და ჩვეულ გარემოს ჯადოსნურს ხდის. დეტალებზე „თბილისი თაიმსს“ მარიამ ზუბაშვილი პასუხობს.
დეტალურად, რას ამზადებთ?
,,კერა“ წარმოადგენს ხელნაკეთი ნივთების სახელოსნოს, სადაც მზადდება ხის დეკორაციები, სანათები, განსხვავებული დიზაინის თაროები, ხელით მოხატული სარკეები, საბავშვო საკიდები და ა.შ.
მასალად რას იყენებთ?
მასალად, ძირითადად, ვიყენებთ ხეს, ხელოვნურ ყვავილებს, ეკოლოგიურად სუფთა ლაქ-საღებავებს.
საზოგადოებას ყველაზე დიდი მოთხოვნა რის მიმართ აქვს?
ძალიან დიდ მოწონებას იმსახურებს სარკეები, როგორც მოხატული, ასევე ხელოვნური ყვავილებით გაფორმებული. კიდევ ერთი ფავორიტი ნივთი არის საკიდი ,,სახლები“, რომლებიც მოხატულია ნათელ ფერებში. სულ ახლახან აღმოვაჩინეთ, რომ ყველაზე მეტად ყვითელ ფერს ვიყენებთ, მზის ფერს, რაც ძალიან სასიამოვნო აღსაქმელია თვალისა და გონებისთვის, ქმნის საოცარ განწყობას მათი დანახვა.
რა არის ის, რითაც თქვენი ნამუშევრები სხვებისგან გამოირჩევა?
პირველი, რასაც ხშირად გვეუბნებიან, არის ის, რომ ჩვენს ნამუშევრებში პოზიტივი, სიყვარული და ბედნიერება იგრძნობა. ,,კერა“ არის პატარა, ერთმანეთზე უზომოდ შეყვარებული ოჯახი, რომლებმაც საყვარელი საქმე აქციეს შემოსავლის წყაროდ. გვიყვარს თითოეული დეკორაცია, რასაც ვამზადებთ, ხშირად მათი ადრესატთან გაშვება ძალიან გვერთულება ხოლმე.
თქვენი პროდუქცია ნებისმიერ გემოვნებაზეა მორგებული?
ჩვენი ნივთები იქმნება სასაჩუქრედ ან საკუთარი სახლის გასალამაზებლად. ,,კერაში“ ძალიან მოსწონთ ის ფაქტი, რომ მაქსიმალურად არიან ჩართულები დეკორაციის დიზაინის შერჩევასა და მზადების პროცესში, ეს ქმნის ერთგვარ განცდას, თითქოს, საკუთარი ხელით შექმნეს საჩუქარი საყვარელი ადამიანისთვის. ვითვალისწინებთ თითოეული მომხმარებლის გემოვნებას და მაქსიმალურად ვცდილობთ, ავსახოთ ის დეკორაციაში.
მასალა მოამზადა : მარიამ ტიელიძემ
