საპატრიარქოს საზოგადოებასთან ურთიერთობის სამსახური ფართოვდება და რამდენიმე მიმართულება ემატება. ესენია: ტელევიზიებთან, სოციალურ და ბეჭდურ მედიასთან კომუნიკაცია, სოციალური საღვთისმეტყველო და საღვთისმსახურო მიმართულება და თემატური სემინარებისა და ტრენინგების სფერო.
აღნიშნული სიახლეები საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ, მისმა მოადგილემ, დეკანოზმა გურამ ჭარელაშვილმა და სხვა სასულიერო პირებმა, საპატრიარქოს ტახტის მოსაყდრეს, ჩხოროწყუსა და სენაკის მიტროპოლიტ შიოს გააცნეს და სამომავლო გეგმების შესახებ ინფორმაცია მიაწოდეს. შეხვედრისას მღვდელმთავარმა სასულიერო პირები დალოცა და მათი საქმიანობისთვის მადლობა გადაუხადა.
აღნიშნულ სიახლეებთან დაკავშირებით დეკანოზი ანდრია ჯაღმაიძე საუბრობს:
„ ორ წელიწადზე ჩვენი სამსახური ემსახურება საქმეს, რომელიც გულისხმობს სიმართლის თქმას ეკლესიის გარშემო მიმდინარე მოვლენებზე. გამოიკვეთა სხვადასხვა მიმართულებები, რომელიც საჭიროებს განსაკუთრებულ ყურადღებას. განსაკუთრებული გულმოდგინებითაა შესასწავლი მრავალი საქმე , რაც ეკლესიას უკავშირდება, როგორც საღვთისმეტყველო კუთხით, ასევე სოციალური მსახურების კუთხით, ამიტომაც ჩვენს სამსახურს ოფიციალურად შეემატა ჯგუფი, რომელიც ჩაიბარებს სხვადასხვა მიმართულებას. იმედი გვაქვს, რომ წარმატებული იქნება ეს მუშაობა და გაცილებით ფართო სფეროს მოვიცავთ ანალიტიკური თვალსაზრისითაც.“
დაგეგმილ სიახლეებთან დაკავშირებით საპატრიარქოს ტელევიზიასთან კომენტარი გააკეთა მამა გურამ ჭარელაშვილმა:
„ თანამედროვე მედია გარემო, ზოგადად, ახალი გამოწვევებით არის სავსე და ბუნებრივია ჩვენც, გარკვეულწილად ამ განვლილი პერიოდის განმავლობაში, საკმაოდ დავიხვეწეთ, საკმაოდ ბევრი გამოწვევა დავინახეთ და მათთან შესაჭიდებლად , ბუნებრივია, გამოიკვეთა კონკრეტული მიმართულებები. მეორე მხრივ, სასიხარულოა, ის, რომ ამ საქმეს ძალიან დიდი ენთუზიაზმით უდგებიან ის სასულიერო პირები, რომლებიც ეკლესიის წიაღში არიან ამ მიზნების განსახორციელებლად.“
მასალა მოამზადა: თორნიკე ყრუაშვილმა
