ადამიანთა გარკვეულ ნაწილს მიაჩნია, რომ ავტომობილში სასიცოცხლოდ მნიშვნელოვანი ღვედის შეკვრა მხოლოდ წინა სავარძლებზეა. თუმცა, ეს ასე არ არის. ამასთან, ჩვენს ქვეყანაში ბევრი არ თვლის საჭიროდ, გამოიყენოს საბავშვო სავარძელი.
ამ საკითხებზე “თბილისი თაიმსს” ტრანსპორტის საკითხების ექსპერტი, მევლუდ მელაძე ესაუბრა.
“ზოგს მიაჩნია, რომ მგზავრი უკანა სავარძელზე უფრო მეტად არის დაცული. ეს ასე არ არის. როდესაც ავტომობილი კარგავს მართვას ან მოდის შეჯახებაში, არანაირი მნიშვნელობა არ აქვს, წინ ზიხარ თუ უკან, ჩვენს ინერციას ღვედის გარეშე ვერ შევაჩერებთ.
შემთხვევა ხდება ერთხელ. ყოველთვის შეიძლება, აღმოჩნდეს ვიღაც, ვინც არ იცავს წესებს. რადგან შემთხვევისგან დაზღვეული არავინ არ არის, სასიცოცხლოდ მნიშვნელოვანია ღვედის შეკვრა”, – განმარტავს რესპონდენტი.
როგორც მელაძე აღნიშნავს, საბავშვო სავარძლების გამოყენების კუთხით, საქართველოში მდგომარეობა კატასტროფულია.
“ამ მხრივ, საერთოდ, კატასტროფული მდგომარეობაა. როგორც წესი, მხოლოდ ძალიან პატარა ბავშვებისთვის იყენებენ მათ. ისიც იმიტომ, რომ ფიზიკურად თავს ვერ იმაგრებენ ისინი. მაგრამ როგორც კი ბავშვი იწყებს თავის შემაგრებას, შემდეგ უკვე სავარძლის საჭიროებაზე აღარ ფიქრობენ. გარწმუნებთ, მილიონი ტესტია გაკეთებული მანეკენებზე იმასთან დაკავშირებით, რომ უკან ბავშვი თავს ვერანაირად ვერ იმაგრებს. პირიქით, რადგან მისთვის აქ ბევრად დიდი სივრცეა, შეჯახების დროს აბსოლუტურად უგზო-უკვლოდ მიდის სხეული. შესაბამისად, პატარა შეჯახებისასაც კი, არავინ იცის, რას მოიწევს ბავშვი.
რამდენად დიდია ბავშვი ფიზიკურად, იმის შესაბამისი სავარძელია მისთვის საჭირო. ბევრ ჰგონია, რომ სავარძელი მხოლოდ ის არის, რაც თოთო ბავშვებისთვის ვიცით”, – ამბობს ტრანსპორტის საკითხების ექსპერტი და იმ მოცემულობის შესახებ საუბრობს, როდესაც, დაჯარიმების შიშით, ადამიანები საგზაო წესებს იცავენ.
“ვიტყვი ერთ რამეს – როგორც კი საქართველოში რამე სავალდებული ხდება, სამწუხაროდ, მაშინვე გამოჩნდებიან ხოლმე ჩასაფრებული ადამიანები, რომლებიც თავიდან, როდესაც სავალდებულოობა შემოდის, ბევრ ფულს აკეთებენ. მეორე მხარე და პრობლემაა, რომ ჩვენს ქვეყანაში ყოველთვის გვაქვს აღსრულების პრობლემა. აღსრულების ნაწილში, თუ დაჯარიმების სერია დაბალი დოზით წამოვა, მე ასე ვიზამდი – დავიწყებდი დაჯარიმებების ზრდას. რიგი მშობელი იმის გამო შეიძენს სავარძელს, რომ არ დაჯარიმდეს. მაგრამ სახელმწიფოს ვალდებულებაა, ნებისმიერ გაუფრთხილდეს, მიუხედავად იმისა, გონიერია თუ უგუნური ავტომობილის მძღოლი.
საბოლოოდ, ყველაფერს მაინც ჯარიმები წყვეტს. ასევე, მასთან დაკავშირებული პრობლემები. ევროპასა და ამერიკაში ასე არ ხდება – რომ უბრალოდ დაგაჯარიმონ და დამთავრდა. მთელი პროცედურებია, სასამართლოთი და ა.შ. რასაც ყველა ადამიანი ერიდება. ჩვენთან ჯარიმები ბევრისთვის კომფორტულია – ვისაც აქვს საშუალება, გადაიხდის ამ ჯარიმას და ივლის არხეინად. თუმცა, ჯარიმა რომ პროცედურულად რთულად გაწერილი იყოს, გინდა თუ არ გინდა, ადამიანი მოერიდები დაჯარიმებას”. – ამბობს მევლუდ მელაძე “თბილისი თაიმსთან” საუბრისას.
მასალა მოამზადა : მარიამ ტიელიძემ
