რაც უფრო უცხო და საინტერესოა პროდუქტი, მით უფრო დიდია მის მიმართ ინტერესი. “შოლტი” – ეს არის ხელნაკეთი, ექსკლუზიური, ნატურალური ტყავისა და ხისგან დამზადებული, ბუზის საკლავი. ეს სწორედ ის ნივთია, რომელიც აუცილებლად მიიპყრობს ნებისმიერის ყურადღებას. რაც განსაკუთრებულად მნიშვნელოვანია, არცერთი ვერსია არ მეორდება.
მარიამ მინდორაძე, ‘შოლტის” დამფუძნებელი, იდეის ავტორი და დიზაინერი “თბილისი თაიმსს” ესაუბრა.
“ამ ეტაპზე, ჩვენ პირველ ნაბიჯებს ვდგამთ. ახლახან გვქონდა გამოფენა-გაყიდვა რიყეზე და პირველად გამოვიტანეთ “შოლტი” განახლებული ვერსიით. თავიდან საცდელი ვერსია გვქონდა გაკეთებული, ეს იყო ზაფხულში. დამზადებული გვქონდა პირველი ხუთი ერთეული. ამან საკმაოდ დიდი ინტერესი და პოზიტივი გამოიწვია. ეს 5 ცალი წარმატებულად გაიყიდა. აქედან გამომდინარე, გადავწყვიტეთ, მასიურად ჩაგვეშვა წარმოებაში.
თითოეული “შოლტი” არის ერთადერთი ვერსია, ყველა არის ექსკლუზივი და არცერთი მეორდება, ისინი არის ხელნაკეთი”, – განმარტავს მარიამი.
რესპონდენტი გვიყვება, როგორ გაჩნდა “შოლტის” შექმნის იდეა.
“დაახლოებით, ორი წლის წინ, ერთ მშვენიერ დღეს გავიღვიძე და ვთქვი – ქართული, ბუზის საკლავი ხომ არ გაგვეკეთებინა.
ეს არის კოლაბორაცია ჩემი და ბექა შარაშენიძის – ის მუშაობს ხეზე. თვითონ შოლტის ტარი გახლავთ ხელით დამუშავებული. აკაციის ხეა და არ შეიცავს არანაირ ქიმიურ დანამატს. ამ ყველაფერს თავიდან სერიოზულად არავინ აღიქვამდა, ჩემს ძალიან ბევრ მეგობარს გაეცინა ამ იდეაზე.
თუმცა, ის შედგა და პირველივე ნაბიჯები წარმატებით გადავდგით.
“შოლტი” 25 დეკემბრამდე არსად გაიყიდება. ვიღებთ შეკვეთებს, რაც გროვდება და 25 დეკემბერს გაიყიდება მხოლოდ ერთი ან ორი დღის განმავლობაში, წინასაშობაოდ და წინასაახალწლოდ – უცხო საჩუქარი რომ იყოს როგორც ქართველი მომხმარებლებისთვის – ისე, უცხოელი. ვნახოთ, რა იქნება უახლოეს მომავალში. ალბათ, გავაფართოებთ წარმოებას, რადგან საინტერესო კოლაბორაცია გამოვიდა”, – ამბობს მარიამ მინდორაძე “თბილისი თაიმსთან” საუბრისას.
მასალა მოამზადა : მარიამ ტიელიძემ
