37 წლის ზვიად თავდგირიძე, რომელიც 8 ოქტომბერს, ბათუმში, კორპუსის სადარბაზოს ჩამონგრევისას დაშავდა, კლინიკა „მედცენტრიდან“ გაწერეს. ის ნანგრევებიდან ამოყვანილი ერთადერთი გადარჩენილია.
მას 11 საათი მოუწია ნანგრევებში, ვერტიკალურ მდგომარეობაში ყოფნა.
ზვიადი ცნობილი ქირურგის, აკაკი ბერიძის შვილიშვილია. როგორც ბერიძემ მედიას არაერთხელ განუცხადა, მისი გადარჩენა ნამდვილი სასწაულია.
ბათუმში, 26 მაისის ქუჩაზე, 13 ნომერი კორპუსის ერთი სადარბაზო 8 ოქტომბერს, დაახლოებით, 12:00 საათზე ჩამოინგრა. შემთხვევას 9 ადამიანის სიცოცხლე ემსხვერპლა, მათ შორის – 3 ბავშვი.
საცხოვრებელი კორპუსის ნგრევის ფაქტზე მიმდინარე გამოძიების ფარგლებში 3 ადამიანი დააკავეს. გამოძიება საქართველოს სსკ-ის 240-ე მუხლის მე-2 ნაწილით და 187-ე მუხლის მე-3 ნაწილით მიმდინარეობს. დანაშაულები 2-დან 10 წლამდე ვადით თავისუფლების აღკვეთას ითვალისწინებს.
