“მსოფლიო ბირჟებზე იყო ძალიან დიდი მატება ხორბლის ფასზე. ეს პროცესი პირდაპირ აისახა ჩვენს რეგიონულ ქვეყნებზე, საიდანაც მოგვაქვს ხორბალი. ეს არის, ძირითადად, რუსეთი, ყაზახეთი და უკრაინა. თუ სეზონის დასაწყისში, ანუ პირველი ივნისიდან ერთი ტონა ხორბლის შემოტანის ფასი იყო 240 დოლარი, დღესდღეობით, ის შეადგენს 320 დოლარს და შესაძლოა, მეტსაც”, – ამის შესახებ საქართველოს ხორბლისა და ფქვილის მწარმოებელთა ასოციაციის აღმასრულებელმა დირექტორმა, ლევან სილაგავამ “თბილისი თაიმსთან” საუბრისას განაცხადა.
მისი თქმით, მატება საკმაოდ დიდია.
“ეს გახლავთ საკმაოდ დიდი მარტება, 80-90 დოლარი ერთ ტონაზე. შესაბამისად, იმავე პერიოდში, ანუ ივნისის თვიდან, როდესაც ერთი ტომარა პირველი ხარისხის ფქვილის ფასი იყო 60 ლარი, ახლა უკვე აცდენილია 70 ლარს. დღეს ბაზარზე ასეთი სიტუაციაა.
ძირითადად, ჩვენ ხორბალი მოგვაქვს რუსეთიდან. მას შემოღებული აქვს “ყოველკვირეული მცურავი ბაჟი”. თუ სეზონის დასაწყისში ეს ბაჟი იყო 25 დოლარი ერთ ტონაზე, დღეს უკვე გახლავთ თითქმის 67 დოლარი, ანუ თითქმის სამჯერაა გაზრდილი საექსპორტო ბაჟი, რაც აგრეთვე დააწვა თვითონ ხორბლის ფასს. ეს ყველაფერი იანგარიშება ერთ ტონაზე და არის ყოველკვირეული. ფორმულა არის შემდეგი: მსოფლიო ბაზრებს – 200 დოლარი, ეს 200 დოლარი არის მუდმივი. რაც დარჩება სხვაობა, იმის 70 %.”, – განმარტავს რესპონდენტი.
სილაგავას თქმით, მსოფლიოს ქვეყნები პურის გაძვირების წინააღმდეგ სხვადასხვანაირად იბრძვიან.
“მსოფლიო ტენდენციებიდან გამომდინარე, ქვეყნები სხვადასხვანაირად იბრძვიან პურის გაძვირებას. მაგალითისთვის, თურქეთმა საიმპორტო გადასახადი ხორბალზე, რომელიც ჰქონდა, დაახლოებით 100 პროცენტით შეამცირა, ნულზე დაიყვანა. აზერბაიჯანმა გაათავისუფლა იმპორტის დღგ-ს მთელი ჯაჭვი ხორბალზე, ამის დაიჭირა ფქვილის ფასი. ზოგ ქვეყანაში სოციალურად დაუცველ ფენას პურის გაძვირების გამო კომპენსაცია ეძლევა. ეს მოცემულობაა დღეს მსოფლიოში. მსოფლიო, ფაქტობრივად, ებრძვის ხორბლის მაღალ ფასებს. ეს არის ხორბლის გარდამავალი მარაგების შექმნა, სასურსათო უსაფრთხოება და ა,შ.
ყოველთვიურ მონიტორინგს აკეთებს ამერიკის შეერთებული შტატების სოფლის მეურნეობის სამინისტრო. – მოსავლის შესახებ, ბალანსის შესახებ, გარდამავალი მარაგების შესახებ. საექსპორტო პოტენციალის შესახებ. დღესდღეობით ბირჟებზე არის სტაბილიზაცია, თუმცა, ძალიან სერიოზული გამოწვევა – ფაქტობრივად, შვიდწლიანი მაქსიმუმები დაფიქსირდა ბირჟაზე, თავის დაღს ასვამს მსოფლიო ფასებს. დღეს უკვე სტაბილურობისკენ ვართ – გაძვირებული, მაგრამ მაღალი ფასებით ვმუშაობთ. ანალიტიკოსი, სამწუხაროდ, ახლო მომავალში ფასების უკან დახევას არ ვარაუდობენ, მსოფლიო ტენდენციებიდან გამომდინარე.
ჩვენი მთავრობა ამის შესახებ საქმის კურსშია. გვაქვს მუდმივი კონსულტაციები. შესაძლებელია, მიიღონ გარკვეული გადაწყვეტილებები, პურის ფასის შესაკავებლად. საკანონმდებლო მი8მართულებით”, – განაცხადა ლევან სილაგავამ “თბილისი თაიმსთან” საუბრისას.
მასალა მოამზადა : მარიამ ტიელიძემ