ჯანდაცვის მინისტრი ეკატერინე ტიკარაძე ამ ეტაპზე სავალდებულო ვაქცინაციის საჭიროებას ვერ ხედავს. როგორც მან ჟურნალისტებს განუცხადა, ვაქცინაციის საკითხზე მოსახლეობასთან კომუნიკაცია უნდა გააქტიურდეს.
“არაერთხელ აღვნიშნე, რომ მნიშვნელოვანია გააქტიურდეს კომუნიკაცია ყველა დონეზე, რათა მაქსიმალურად ავუხსნათ მოსახლეობის თითოეულ რგოლს თუ რატომ არის მნიშვნელოვანი ვაქცინაცია; წავახალისოთ ისინი, რომ აიცრან და მაქსიმალურად შევიკავოთ თავი ნებისმიერი იძულებითი ღონისძიებისგან. ეს არის ჯანდაცვის სამინისტროს პოზიცია, რომელიც არაერთხელ გაჟღერებულა,” – აცხადებს ტიკარაძე.
მისივე თქმით, ასევე მნიშვნელოვანია გაიგონ თუ რატომ ამბობენ მოქალაქეები აცრაზე უარს.
ამასთან, ჟურნალისტების დამაზუსტებელ კითხვაზე, რომელიც სავალდებულო ვაქცინაციის საკითხზე მთავრობის მეთაურისა და მინისტრისგან განსხვავებით, NCDC-ის დირექტორის განსხვავებულ პოზიციას შეეხებოდა <ამირან გამყრელიძე სავალდებულო ვაქცინაციის ალბათობას უშვებს>, ეკატერინე ტიკარაძე აცხადებს, რომ საკოორდინაციო საბჭოში არანაირი დაპირისპირება არ არსებობს.
“ვთვლი, რომ ამ ეტაპისთვის ჩვენ სავალდებულო ვაქცინაცია არ გვესაჭიროება. მნიშვნელოვანია, გამოკვლეული იყოს თითოელი მიზეზი თუ რატომ ამბობს მოაქალაქე უარს ვაქცინაციაზე, განემარტოთ მათ ვაქცინაციის სარგებელი და შესაბამისად, მოხდეს მოქალაქეების დაყოლიება ამ პროცესზე,” – განაცხადა ტიკარაძემ.