“პატარა გრუთი” – ყველაფერი პატარა მებაღეებისთვის ერთ ყუთში

კოვიდპანდემიიდან გამომდინარე, ადამიანებს გაგვიჩნდა მეტი დრო საკუთარ სახლებში გასატარებლად. ამან განაპირობა ის, რომ გვეფიქრა და აღმოგვეჩინა, დამატებით რის გაკეთება შეგვეძლო ჩვენთვის და არამხოლოდ ჩვენთვის.
სწორედ ასე გაჩნდა “პატარა გრუთი” – ყუთი პატარებისთვის, რომელშიც თავმოყრილია ყველა ის ხელსაწყო. რაც “პატარა მებაღეებს” სჭირდებათ – მცენარის ჩითილი, ნიჩბების ნაკრები, ქოთანი, მებაღის წინსაფარი, მიწა, დეკორატიული კენჭები, გრუთის გასაფერადებელი ფერადი ფანქრები, საინფორმაციო ფლაერი, მოსარწყავი ბოთლი, სამუშაო ხელთათმანი.
მისი შექმნის ისტორიასა და მიზანზე “თბილისი თაიმსს” თინათინ ნანეიშვილი ესაუბრა.

ზოგადად, რას ითვალისწინებს „პატარა გრუთის“ საქმიანობა?
“Baby Groot • პატარა გრუთი”-ის შექმნის იდეა გაჩნდა პანდემიის დაწყებასთან ერთად – მაშინ, როდესაც ყველა ერთი პრობლემის წინაშე დავდექით: როგორ შეგვემცირებინა ჩვენი შვილებისთვის გაჯეტებთან ურთიერთობა. პარალელურად, მათში გაგვეღვივებინა ბუნების სიყვარული, გაგვეჩინა მათთვის პასუხისმგებლობისა და ზრუნვის გრძნობა რაღაცის ან ვიღაცის მიმართ, გვეჩვენებინა ბუნების საოცრება, თუ როგორ იზრდება მათ თვალწინ სხვადასხვა სახის მცენარე და, საერთოდაც, დაეფასებინათ და გაეცნობიერებინათ სხვისი შრომა.
რა მიზანზეა ის ორიენტირებული?
სტარტაპის მიზანია, მეტ ბავშვს ჰქონდეს ბუნებასთან, მცენარეებთან ურთიერთობა, ისწავლონ მათი მოვლა და მათზე ზრუნვა. ამ წამოწყებას ერთგვარი შემეცნებითი დატვირთვაც აქვს, ბავშვები ეცნობიან ინფორმაციას კონკრეტულ მცენარეზე და ვფიქრობ, ეს პროცესი საინტერესო თერაპია იქნება მათთვის და მნიშვნელოვან როლს ითამაშებს მათი ფსიქიკის სწორ განვითარებაში.
ბევრი დაინტერესდა თქვენი საქმიანობით?
ძალიან კარგი გამოხმაურება მოყვა “პატარა გრუთის” სტარტაპს. საწყის ეტაპზევე საკმაოდ დიდი იყო ინტერესი ხალხის მხრიდან, ასევე, ამ პერიოდის განმავლობაში იყო დაინტერესება მსხვილი კომპანიის მხრიდანაც კორპორატიული შეკვეთის სახით. ამ ყველაფერმა უფრო მეტი მოტივაცია მომცა, რომ დროთა განმავლობაში ეს სტარტაპი კიდევ უფრო მეტად განვავითარო და დავხვეწო. “პატარა გრუთის” არსებობის პერიოდის განმავლობაში ბევრი რამ კიდევ უფრო მეტად დაიხვეწა.
ნებისმიერი ასაკის ადამიანებისთვისაა ის ხელმისაწვდომი?
“პატარა გრუთის” ბოქსები განკუთვნილია 3-დან 16 წლამდე ბავშვებისთვის. რაც შეეხება ბოქსებს უფროსებისთვის, მომავალში ამასაც ვგეგმავ. ამ ბოქსებში იქნება უფრო რთულად მოსავლელი მცენარეები, რომელსაც ბოქსში დაემატება სპეციალური სასუქები, საჭირო ინსტრუმენტები და ა.შ. ეს ყველაფერი ჯერ იდეის დონეზეა, ამიტომ ჯობს, წინასწარ არ ვისაუბრო. ჯერჯერობით, მთავარი მიზანი არის, ბავშვებს შევაყვაროთ მცენარეებთან ურთიერთობა და მშობლებთან ერთად ვიზრუნოთ მათ სწორ განვითარებაზე
არის რაიმე წესები, რაც უნდა გავითვალისწინოთ?
ყველა მცენარის ბოქსს თან ახლავს საინფორმაციო ფლაერი, სადაც არის ინფორმაცია, თუ როგორ უნდა მოვუაროთ კონკრეტულ მცენარეს, რა ინტენსივობით არის მისი მორწყვა საჭირო, როგორი სინათლე უყვარს, რა ტემპერატურაზე იგრძნობს თავს კარგად და ა.შ. ბავშვებმა უნდა იხელმძღვანელონ საინფორმაციო ფლაერში არსებული, მოვლის ინსტრუქციით.

მასალა მოამზადა : მარიამ ტიელიძემ