„თაია“ – მისტიკური და იდუმალი ნამუშევრების სახელოსნო

ჯადოსნური, ზღაპრული, ორიგინალური და დასამახსოვრებელი – ეს იმ ნამუშევრების ზუსტი აღწერილობაა, რომლებსაც „თაია“ გვთავაზობს. მისი ისტორია არცთუ ისე დიდი ხნის წინ დაიწყო. ძალიან მოულოდნელად, მისმა ავტორმა, რომელსაც ადრე ხელოვნებასთან არანაირი კავშირი არ ჰქონია, გადაწყვიტა, წამოეწყო საქმიანობა, რომელიც უკვე საკუთარი ყოველდღიურობის განუყოფელი ნაწილია.
დეტალებზე „თბილისი თაიმსს“ თამუნა იანვარაშვილი თავად ესაუბრა

რამდენი ხანია, რაც „თაია“ არსებობს?

„თაიას“ ისტორია დაიწყო 1 წლის წინ, ახალ წლამდე რამდენიმე დღით ადრე, სრულიად გაუცნობიერებლად. არ მქონდა გამიზნულად მინიატურული ნივთების დამზადება და მათი რეალიზაცია. ახლობლების დაჟინებული თხოვნით, გამოვაქვეყნე სოციალურ ქსელში, მას შემდეგ აქტიურად ვარ ჩართული. პირველი ნამუშევარიც ზამთარს უკავშირდება, ეს იყო „ძველი სახლში ტყეში“.
არანაირი კავშირი არ მქონია ხელოვნებასთან, პროფესიით ჟურნალისტი ვარ და ამჟამად სადაზღვეო კომპანიაში ვმუშაობ, თუმცა, „თაია“ არის ზუსტად ის, რისი განვითარებაც და რეალიზებაც მსურს.

რა მიზნით შეიქმნა ის?

„თაია“ ჩემთვის არის სხვა სამყარო, სადაც შემიძლია, გამოვხატო საკუთარი თავი, სადაც შემიძლია – პატარა დეტალებისგან განსაკუთრებული, დასამახსოვრებელი ნივთი შევქმნა. თითქმის ყველა ჩემი ნამუშევარი მისტიკური და იდუმალია, ის მხოლოდ ნაკეთობა არ არის. ვცდილობ, მასში გამოვხატო ემოციები და ფანტაზია. თითოეულ მინიატურას თავისი სათქმელი აქვს.

დეტალურად, რას ამზადებთ?

„დიორამა“, ასე ჰქვია მიმდინარეობას, რომელსაც ვამზადებ, ეს არის სამგანზომილებიანი სცენა, რომელიც ხშირად შეგხვდებათ მუზეუმებში, სასწავლო დაწესებულებებში და ა.შ. ნამუშევრები ძირითადად ჩემი ფანტაზიით იქმნება, იმას, რაც ჩემთან ახლოს არ არის ან საინტერესოდ არ მიმაჩნია, არ ვამზადებ. მასალას სხვადასხვას ვიყენებ, თიხა, ხე, რკინა, პლასტმასი, მუყაო და ა.შ. დამზადებაც საკმაოდ დიდ დროსა და სირთულესთან არის დაკავშირებული, რაც უფრო დეტალებში ვაკეთებ, უფრო მეტად შრომატევადია.

ჰელოუინისთვის გქონდათ მზადება – რა ნამუშევრები შექმენით?

ჰელოუინისთვის რამდენიმე დღე მქონდა მოსამზადებლად, მაქსიმალურად ვეცადე – მოკლე დროში დამესრულებინა და მოვახერხე, ვფიქრობ, საკმაოდ საინტერესო და საშიში გამოვიდა.

უცხოელი მომხმარებელი თუ გყავთ?

სხვათა შორის, საზღვარგარეთ საკმაოდ პოპულარული ხელობაა, ბევრი საინტერესო და ნიჭიერი დიორამისტია, ხშირად მიფასებენ ხოლმე ნამუშევრებს, რაც შეეხება მომხმარებელს – ძირითადად, ქართულ ბაზარზე ვართ, ჯერჯერობოთ. სამომავლოდ ვგეგმავ ქვეყნის ფარგლებს გარეთ გატანას.

მასალა მოამზადა : მარიამ ტიელიძემ