მედიკამენტების ფასის რეგულირება და ხარისხი იყო დღეს მთავარი თემა ჯანდაცვის სამინისტროში გამართულ შეხვედრაზე, რომელსაც სამინისტროსა და რეგულირების სააგენტოს ხელმძღვანელი პირები, კონკურენციის სააგენტოს, პარლამენტის და ჯანმრთელობის მსოფლიო ორგანიზაციის წარმომადგენლები ესწრებოდნენ.
ეკატერინე ტიკარაძემ აღნიშნავს, რომ წამლის ფასი მოსახლეობისთვის ძალიან დიდ ტვირთს წარმოადგენს და ჯანდაცვის სამინისტრო აღნიშნული პრობლების აღმოსაფხვრელად აქტიურ რეჟიმში იწყებს მუშაობას.
სამინისტროს მიერ გავრცელებულ ინფორმაციაში ნათქვამია, რომ შეხვედრაზე მოხდა სამუშაო ჯგუფის დაკომპლექტება, რომელიც წამლის ფასის რეგულირებასთან დაკავშირებით კონკრეტულ ინიციატივებს შეიმუშავებს, რასაც საბოლოოდ საკანონმდებლო სახე მიეცემა.
„შეხვედრის მთავარი მიზანი იყო როგორც წამლის ხარისხი, ასევე წამლის ფასი, რომელიც უკვე წლებია ძალიან დიდ ტვირთს წარმოადგენს როგორც ჩვენი მოსახლეობისთვის, ისე ჯანდაცვის სისტემისთვის. ამასთან დაკავშირებით 2019 წლის შემდეგ მიმდინარეობს მუშაობა ჯანდაცვის სამინისტროში. ასევე, ჯანდაცვის კომიტეტი მუშაობდა წამლის ნაწილზე, ასევე ჯანმომ დადო არაერთოი რეკომენდაცია ამასთან დაკავშირებით. საკითხის კვლევაში ჩავრთეთ კონკურენციის სააგენტოც.
დღეიდან სამუშაო ჯგუფების ფორმატებში დავიწყებთ მუშაობას პრობლემების მიმართულებით და მერე გავიტანთ მნიშვნელოვან კანონს, რომელიც აისახება ჩვენი მოქალაქეების კეთილდღეობაზე, როგორც წამლების ფასის, ასევე ხარისხის კუთხით“, – განაცხადა ეკატერინე ტიკარაძემ.
„ჯანდაცვის კომიტეტში საკითხზე უკვე წელიწადზე მეტია ვმუშაობთ, მოვახდინეთ არსებული საკანონმდებლო ბაზის რევიზია, რომელიც ამ მიმართულებას არეგულირებს. კანონმდებლობა არის მოძველებული, 2009 წელს მიღებული, ამიტომ ევროპელ კოლეგებთან ერთად შევიმუშავეთ ახალი საკანონმდებლო ბაზა, რომელიც იქნება უფრო მეტად დახვეწელი და უზრუნველყოფს, რომ ამ სეტორში ბაზარი დარეგულირდეს და ქვეყანაში მედიკამენტი იქნება ხარისხიანი, უსაფრთხო და ხელმისაწვდომი“, – განაცხადა კომიტეტის თავმჯდომარე დიმიტრი ხუნდაძემ.
შეგახსენებთ, ამ პროცესს წინ უძღოდა, კონკურენციის სააგენტოს მიერ ფარმაცევტული ბაზრის სამწლიანი მონიტორინგი. აღნიშნული მონიტორინგის შუალედური დასკვნა გასულ კვირას გახდა ცნობილი.
კვლევის მიხედვით, კონკურენციის სააგენტო სახელმწიფოს არაერთ რეკომენდაციას აძლევს, მათ შორისაა გენერიკული მედიკამენტების სამედიცინო რეცეპტში მითითების წესების განსაზღვრა, ასევე GMP სტანდარტების დანერგვა. დოკუმენტი შეეხება თავად ფარმაცევტული კომპანიების სტრუქტურას და მათ ორგანიზაციულ მოწყობასაც. კონკურენციის სააგენტო სახელმწიფოს მოუწოდებს, დაწესდეს შემზღუდავი ნორმები ბაზრის ჰოლდინგურ სტრუქტურასთან მიმართებით.
კიდევ ერთი რეკომენდაციით, კონკურენციის სააგენტო მედიკამენტების ბაზრის გარკვეულ სეგმენტზე თავისუფალი ფასწარმოქმნის შეზღუდვის რეკომენდაციას გასცემს, რაც იმას ნიშნავს, რომ ფარმაცევტულ კომპანიებს კონკრეტული მედიკამენტებისთვის შესაძლოა რეალიზაციის ღირებულების ჩარჩოები დაუწესდეთ.
