საქართველოს კულტურისა და ძეგლთა დაცვის სამინისტროს ინიციატივით, ორგანიზებითა და მხარდაჭერით, დღეიდან 2013 წლის ბოლომდე, ლიტვის დედაქალაქი ვილნიუსი თანამედროვე ქართულ ხელოვნებას მასპინძლობს.
დღეს, ლიტვის ეროვნული ფილარმონიული საზოგადოების მცირე დაბაზში, საფორტეპიანო ტრიოს „სემპრე“ კონცერტი იმართება.
სამინისტროს ცნობით, თანამედროვე ქართული ხელოვნების, რაც შეიძლება სრულად წარმოჩენა ვილნიუსში ევროკავშირის აღმოსავლეთ პარტნიორობის სამიტამდე დაიწყება, გაგრძელდება მის პარალელურად და გასტანს იანვრამდე.
საქართველოს კულტურისა და ძეგლთა დაცვის სამინისტროს მიერ დაგეგმილი მასშტაბური ღონისძიებები კიდევ ერთხელ დაადასტურებს საქართველოსა და ლიტვას შორის არსებულ მჭიდრო კულტურულ და პოლიტიკურ კავშირებს.
თითქმის ორი თვის მანძილზე ვილნიუსი გაიჟღინთება ქართული მრავალფეროვანი კულტურით. კულტურულ პროგრამაში წარმოდგენილნი არიან ქართველი მუსიკოსები, მხატვრები და კინოხელოვანები. მოეწყობა თვითნასწავლი ფოტოგრაფის, შალვა ალხანაიძის, ნამუშევრების გამოფენა. ქართული კულტურული მემკვიდრეობის საგანძურიდან ლიტვის ხელოვნების მუზეუმში გამოიფინება ძვ. წ. I ათასწლეულის ვერცხლისა და ბრინჯაოს ექსპონატები.
გაიმართება საქართველო–ესტონეთის ახალი, ერთობლივი ნამუშევრის “მანდარინები“ და სხვა ქართული ფილმების ჩვენება.
08.11.13
