ჩვენ ძალიან ბევრ ადამიანს ვიცნობთ, რომელსაც ხელოვნების ერთი კონკრეტული მიმართულებით დიდი ინტერესი და ნიჭი აქვს. თუმცა, ცოტაა ადამიანი, რომელის ამ ნიჭს არაერთი მიმართულებით ავლენს. მარიამ ტეფნაძე მათ შორისაა.
მისი კალიგრაფიული ნამუშევრები საზოგადოებისთვის კარგად არის ცნობილი. საინტერესოა, რომ, ამის გარდა, ის ხელოვნების არაერთი განხრით არის დაინტერესებული.
მარიამი სამხატვრო აკადემიაში, ფერწერის მიმართულებით სწავლობს. ამჟამად, მესამე კურსის სტუდენტია. როგორც ის აღნიშნავს, ხელოვნების მხრივ ნიჭი ბავშვობიდან აქვს.
“ზოგადად, კალიგრაფია არ მისწავლია. ეს უნარი თვითონ გამოვიმუშავე, მსგავსად ხატვისა და, ზოგადად, ხელოვნების. ბავშვობიდან მაქვს ნიჭი და დროდადრო მას ვავითარებ. ყოველთვის მიზიდავდა სიძველეები. მომწონდა, დაძველებულ ფურცლებზე რომ ჰქონდათ ხოლმე ნაწერები. ანბანს, მათ შორის, დაძველებულ ფურცლებზე ვაკეთებ, თუმცა, ჯერჯერობით, არცთუ ისე ხშირად”.
ამ მხრივ, რა აქტივობებში მიგიღიათ მონაწილეობა?
მოგვიანებით, მომივიდა იდეა აკანთის ფოთლების გამოყენებასთან დაკავშირებით კალიგრაფიასთან მიმართებით. ქართული ანბანის მრგვლოვნობაც ამაში ძალიან მიწყობდა ხელს. მინდოდა მათი სინთეზის შექმნა. მქონდა შექმნილი ორი ასო – “ლ” და “ჩ”. შემდეგ, ხელნაწერთა ეროვნული ცენტრიდან მოგვივიდა კალიგრაფებს შემოთავაზება, რომ უნდა გაგვეკეთებინა ჩვენი ანბანი. არ ჰქონდა მნიშვნელობა, ეს იქნებოდა სათითაოდ თუ ერთ ფურცელზე. ამ დროს მომეცა საშუალება, გამეჟღერებინა ჩემი იდეა. ეს იყო ძალიან შრომატევადი პროცესი, რომელსაც ერთი თვე მოვანდომე.
როგორც ის აღნიშნავს, ამის შემდეგ, ამ ანბანთან დაკავშირებით უნდა ყოფილიყო რამდენიმე წამოწყება, მაგრამ, სამწუხაროდ, კოვიდპანდემიამ ამას ხელი შეუშალა.
მარიამი ამბობს, რომ, 2016 წლიდან, მონაწილეობა არაერთ გამოფენაში აქვს მიღებული.
“2016 წლიდან მოყოლებული, მონაწილეობას ვიღებდი გამოფენებზე. ვმონაწილეობდი კონკურში და ყოველი კონკურსის ბოლოს გვქონდა ჩვენი ნამუშევრების გამოფენა. მასში მონაწილეობას იღებდნენ მთელი საქართველოდან. უკვე შემდგომ, 2019 წლის 29 თებერვალს ეროვნულ ბიბლიოთეკაში გვქონდა გამოფენა. გამოვიდა საკმაოდ საინტერესო, გაგრძელდა რამდენიმე დღეს. იყო არაერთი კალიგრაფის ნამუშევრები, მათ შორის, ბავშვებისაც”.
მარიამ, კალიგრაფიის გარდა, კიდევ რა ინტერესები გაქვს?
ხელოვნების ძალიან ბევრი სფერო მიზიდავს – ქარგვა, ქსოვა, კერვა… ეს ბავშვობიდან ასეა. ახლაც, როდესაც ხასიათზე ვარ, ვქსოვ, ვკერავ… უბრალოდ, ხატვას ყველაზე მეტად გამოვარჩევ, რადგან ყველაზე დიდ სიმშვიდეს მანიჭებს.
მასალა მოამზადა : მარიამ ტიელიძემ
